Jezqazǵanda polıtseıge dáretin shashqan azamatqa raqymshylyq jasaldy
QARAǴANDY. QazAqparat - Іshki ister mınıstri Qalmuhanbet Qasymovtyń jeke baqylaýynda bolǵan jol-patrýldik polıtseıine shabýyl jasaý týraly atyshýly qylmystyq is boıynsha, sottalǵan kólik ıesi úkimdi oryndaýdan bosatyldy, dep habarlady «QazAqparat» HAA tilshisi.
«Qylmystyq-atqarý júıesi komıteti departamentiniń probatsııa qyzmetiniń materıaly qaralyp, ol boıynsha sottalýshy Qaırat Elýbaevti úkimdi oryndaýdan jáne eki jylǵa bas bostandyǵyn shekteý túrindegi jazadan, 200 AEK kóleminde aıyppul tóleýden bosatý týraly qaýly shyqty», - dep habarlady Jezqazǵan qalalyq sotynyń baspasóz qyzmetinen.
«QR Táýelsizdiginiń 25 jyldyǵyna baılanysty raqymshylyq jasaý týraly» QR Zańynyń 2-babyna sáıkes, asa aýyr emes qylmys jasaǵan tulǵalar jazadan bosatylady», - dep habarlady sottan.
Al jábirlenýshi, búginde eks-polıtseı Tólegen Igibekov oǵan dáretin shashqan júrgizýshini jazadan bosatqanyna kelispeıdi.
«Júrgizýshini shapalaqpen bastan uryp jibergenim úshin maǵan 5 jyl berdi. BAQ-ta rezonans týdyryp, ishki ister mınıstriniń aralasýymen ǵana meniń merzimimdi sharttyǵa aýystyrdy. Al Elýbaevti Qylmystyq kodekstiń 4 babynyń (378 «bılik ókilin balaǵattaý», 379 «bılik ókiline baǵynbaý», 380 «bılik ókiline kúsh qoldaný», 293 «buzaqylyq») alty epızody boıynsha eki jylǵa ǵana sottady», - dep narazylyǵyn bildirdi Igibekov.
Eske salaıyq, oqıǵa 2015 jyly jeltoqsan aıynda boldy. Sot materıaldary boıynsha, 21 jastaǵy polıtsııa serjanty Tólegen Igibekov jol-patrýl polıtsııasy ekıpajynyń quramynda Qaırat Elýbaev júrgizip kele jatqan kólikti toqtatqan.
Polıtsııa qyzmetkerleri Elýbaevti ishimdik ishken, ıa ishpegenin anyqtaý úshin narkologııalyq dıspanserge alyp barǵan. Saraptama nátıjelerimen kelispegen Elýbaev zárin saraptamadan ótkizýdi talap etken. Dárethanadan shyqqan ol saraptamaǵa jasatýǵa alǵan zárin Igibekovtiń betine shashyp jibergen. Budan soń Igibekov Elýbaevti shapalaqpen salyp jibergen.
