Jezqazǵanda órt saldarynan turǵyn úılerdiń 40%-ǵa jýyǵy elektr jaryǵynsyz qaldy
JEZQAZǴAN. QazAqparat – Jezqazǵan JEO-da órt shyqty. Tótenshe jaǵdaı saldarynan qaladaǵy turǵyn úıler men nysandardyń 40%-y elektr jaryǵynsyz qaldy, dep habarlaıdy QazAqparat tilshisi.
7 qarasha kúni saǵat 18.43-te Jezqazǵandaǵy «Kazahmys Energy» JShS-niń JEO-da órt paıda boldy. Ot sharpyǵan alańnyń jalpy aýdany 100 sharshy metrdi qurady.
«Esepten shyǵarylǵan plastmassa shamdar, joǵary voltty baqylaý kabelderi jáne elektr tsehynyń kabeldi jartylaı qabatyndaǵy bes tereze bloktary janyp ketti. Qaraǵandy oblysy TJ departamentiniń Órt sóndirý jáne avarııalyq-qutqarý jumystary qyzmetiniń kúshimen elektr tsehynan jeti adam evakýatsııalandy. Órt 20.11-de sóndirildi. Qaza bolǵandar men zardap shekkender joq. Órttiń shyǵý sebebi anyqtalýda», - dep habarlady Qaraǵandy oblysy TJD baspasóz qyzmeti.
Jezqazǵan ákimdiginde qalanyń turǵyn úıleri men nysandarynyń 30-40%-y elektr jaryǵynsyz qalǵanyn túsindirdi. Alaıda, túnde apattyq jelilerden qaıta qosylý aıaqtalyp, barlyq tutynýshylarǵa elektr energııasy berildi, dep málim etti ákimdikte.
«Jezqazǵan JEO-daǵy apattyń saldarlary joıyldy. Qaıta qosý keshe, 07.11.2021 jyly saǵat 23.05-te aıaqtaldy, barlyq tutynýshylarǵa elektr energııasyn berý qalpyna keltirildi. Qazirgi ýaqytta qala elektr energııasymen tolyq qamtamasyz etilýde», - dep habarlady Jezqazǵan qalasy ákimdiginiń baspasóz qyzmeti.
