Jezqazǵanda ómirdi saqtap qalýǵa baǵyttalǵan biregeı operatsııalar jasala bastady
ULYTAÝ. KAZINFORM — Ulytaý oblysynyń turǵyndary alǵash ret óz aımaǵynan shyqpaı-aq joǵary tehnologııalyq kardıohırýrgııalyq kómek ala alady. «Jezqazǵan» Medıtsınalyq ortalyǵynyń bazasynda júrektiń kenet toqtap qalýynan qorǵaıtyn qurylǵy — kardıoverter-defıbrıllıator ornatý boıynsha otalary sátti júrgizile bastady.
Ulytaý óńiriniń medıtsınasy damý jolynda jańa beleske kóterildi. «Jezqazǵan» Medıtsınalyq ortalyǵynda alǵash ret joǵary tehnologııalyq medıtsınalyq kómek (JTMK) kórsetile bastady. Bul mańyzdy qadam Qazaqstan Respýblıkasy Densaýlyq saqtaý mınıstrliginiń, Áleýmettik medıtsınalyq saqtandyrý qorynyń jáne «Qazaqmys korporatsııasy» JShS-niń qoldaýymen júzege asty. Kompanııanyń zamanaýı materıaldyq-tehnıkalyq bazasy ınnovatsııalyq tehnologııalardy engizýge múmkindik berdi.
Jobanyń basty jetistigi — alǵashqy tabysty operatsııalar. Kardıoverter-defıbrıllıator — júrektiń «qorǵaýshysy» ispetti shaǵyn qurylǵy. Ol qaýipti yrǵaq buzylystaryn avtomatty túrde anyqtap, qajet sátte elektr ımpýlsin beredi, sóıtip júrektiń kenetten toqtap qalýyna jol bermeıdi. Mundaı joǵary dáldiktegi operatsııalar bes patsıentke sátti jasalyp, barlyǵy da mindetti áleýmettik medıtsınalyq saqtandyrý (MÁMS) júıesi aıasynda tegin júrgizildi.
Buǵan deıin mundaı em qajet bolǵan Ulytaý turǵyndary Astanaǵa nemese ózge iri medıtsınalyq ortalyqtarǵa barýǵa májbúr edi. Bul uzaq saparlar, qosymsha shyǵyndar men aýyr dıagnozy bar naýqastar úshin úlken kúızelis týdyratyn. Endi, Jezqazǵanda JTMK engizilgennen keıin, joǵary tehnologııalyq kardıohırýrgııalyq kómek ár adamǵa óz óńirinde qoljetimdi boldy.
— Biz bul nátıjege uzaq daıyndaldyq. Basty maqsatymyz — óńir turǵyndary eýropalyq deńgeıdegi medıtsınalyq kómekti óz qalasynda-aq alý múmkindigine ıe bolýy, — dedi joba jetekshisi, UMC Heart Center ınterventsııalyq arıtmologııa bóliminiń meńgerýshisi Ómirbek Muzdaruly Nuralınov.
Onyń aıtýynsha, mundaı otalar — asa kúrdeli ári kóp eńbekti qajet etetin protsess. Ol joǵary kásibı biliktiligi bar dárigerlerdiń eńbegin, sondaı-aq zamanaýı medıtsınalyq jabdyqtardy talap etedi. Memleket pen «Qazaqmys» arasyndaǵy seriktestik nátıjesinde Jezqazǵan medıtsınalyq ortalyǵynda osyndaı joǵary deńgeıdegi aralasýlarǵa qajetti barlyq jaǵdaı jasaldy.
Kardıoverter-defıbrıllıatordy ornatýdyń basty maqsaty — qarynshalyq fıbrıllıatsııa men júrektiń kenetten toqtap qalýynyń aldyn alý. Bul qurylǵylar júrek aýrýy asqyný qaýpi joǵary adamdar úshin alǵashqy profılaktıka retinde de, sondaı-aq qaýipti epızodtardy buryn ótkergen naýqastar úshin qaıtalama aldyn alý sharasy retinde de qoldanylady.
Jaqyn ýaqytta osyndaı operatsııalar turaqty túrde júrgizilip, MÁMS júıesinde saqtandyrylǵan barlyq azamattarǵa qoljetimdi bolmaq. Bul óz kezeginde júrek-qan tamyrlary aýrýlarynan bolatyn ólim-jitim deńgeıin aıtarlyqtaı tómendetýge múmkindik beredi.
Jezqazǵanda JTMK engizilýi — tek medıtsınalyq jańalyq emes, óńirdiń áleýmettik damýy turǵysynan da zor jetistik. Bul — densaýlyq saqtaý salasyndaǵy ınnovatsııalar elordamen shektelmeı, aımaqtarda da keńinen qoljetimdi bola alatynyn dáleldeıtin naqty mysal.
— Búginde Qazaqstanda óńirlik medıtsınanyń jańa úlgisi qalyptasyp keledi: zamanaýı tehnologııalar, kásibı mamandar men memlekettik qoldaý birigip, halyqtyń ıgiligine qyzmet etýde, — dep atap ótti ortalyq mamandarynyń biri.
Mundaı serpindi damý Ulytaý óńirine jańa múmkindikter ashady. Endi ár turǵyn sapaly ári ýaqtyly medıtsınalyq kómekke senim arta alady. Al Jezqazǵan birtindep Ortalyq Qazaqstandaǵy zamanaýı medıtsınanyń tirek ortalyǵyna aınalyp keledi.
Buǵan deıin Ulytaý oblysynda alǵash ret ashyq júrekke operatsııa jasalǵany habarlanǵan bolatyn.