Jezqazǵanda oqýshylar papaııa ósirip jatyr
Balalar ózderiniń jumystaryn tanystyryp, josparlary týraly aıtyp berdi, dep habarlaıdy QazAqparat tilshisi.
El Táýelsizdiginiń 30 jyldyq mereıtoıyna oraı Jezqazǵan qalasy bilim bóliminiń Balalar men jasóspirimder shyǵarmashylyq ortalyǵynyń «Ekologııa jáne tehnıkalyq shyǵarmashylyq» bóliminde tárbıelenýshiler «Meniń jobalarym – Meniń elim» taqyrybynda shyǵarmashylyq óner kórsetti.
«Jasyl tehnologııalar» úıirmesiniń jas ekologtary «Tabıǵat rekordshylary» jobasyn usyndy. Olar álemdegi eń ónimdi jemisterdiń biri – papaııanyń tuqymyn otyrǵyzdy jáne óz tájirıbeleri týraly aıtty.
«Bizdiń tárbıelenýshilerimiz Qazaqstanda balamasy joq papaııa ósirý jobasyn ázirledi. Olar tez ósetin jáne joǵary ónimdi surypty ósirýdi josparlap otyr. Biz jobanyń tıimdiligin eseptedik jáne ol jaqsy nátıje beredi dep oılaımyz», – dedi balalar men jasóspirimder shyǵarmashylyǵy ortalyǵynyń Ekologııa jáne tehnıkalyq shyǵarmashylyq bóliminiń meńgerýshisi Andreı Matveev.
«Jas ekolog» úıirmesiniń tárbıelenýshileri «Ǵajaıyp tal» jobasyn tanystyrdy. Olar eki jyl aralyǵynda tez boı kóteretin kıizdi pavlovnııa aǵashyn ósiredi.
«Joba aıasynda tálimbaq uıymdastyrylyp, 100-den astam pavlovnııa ósirilip, otyrǵyzyldy. Bul aǵashtar ósip, bizdiń qalamyzdy, mektepter, saıajaılar men jeke úılerdiń aýmaqtaryn, sondaı-aq balalar men jasóspirimderdi damytý ortalyǵyn bezendiredi. Bul tal ádettegiden 10 ese kóp ottegi shyǵarady, sonymen qatar óziniń sulýlyǵymen jáne gúldenýimen qýantady», – dedi Andreı Matveev.
«Ekoplıýs» úıirmesiniń tárbıelenýshileri 3D LAB jobasyn jáne Green Capsule ázirlemesin usyndy. 3D LAB jobasyn iske asyra otyryp, balalar ártúrli jumystar men tapsyrmalardy oryndaıtyn robotty manıpýlıator qolyn jáne 3D prınterde basylǵan kóp fýnktsııaly ushaq jasady.
Green Capsule – aǵashtardyń avtonomdy ósýine arnalǵan kapsýla – respýblıkalyq startaptar baıqaýynda ekinshi oryn aldy.
«Startaptar baıqaýynda biz Green Capsule jobasyn iske asyrý úshin 150 myń teńge utyp aldyq. Qarapaıym sózben aıtqanda, biz ósimdikterdi ózdiginen sýarýǵa múmkindik beretin syıymdylyǵy 35–40 lıtr bolatyn rezervýar ázirledik. Bolashaqta biz bul rezervýarlardy sý ótkizbeıtin etip jasaýdy josparlap otyrmyz. Biz kapsýlalarymyzdy balalar men jasóspirimderdi damytý ortalyǵynyń bazasynda ornalasqan tálimbaqta synap kórdik. Sondaı-aq jaqyn arada osy jobaǵa patent alǵymyz keledi», – dedi jobany ázirleýshi Arman Shaıhıev.