Jezqazǵanda Nazarbaev zııatkerlik mektebi ashylady
QARAǴANDY. QazAqparat - Jezqazǵanda Nazarbaev zııatkerlik mektebi ashylady. Bul úshin qazirdiń ózinde qajetti ruqsat alyndy, dep habarlaıdy QazAqparat tilshisi.
Jańa bilim ordasyndaǵy oqý sharttary men sapasy respýblıkanyń iri qalalaryndaǵy osyndaı mekteptermen birdeı bolady. Bul týraly Qaraǵandy oblysynyń ákimi Jeńis Qasymbek apparattyq jıynda málimdedi.
Nazarbaev zııatkerlik mektebi aımaqta jaqyn bolashaqta qurylysy josparlanǵan alty bilim berý uıymynyń biri bolady. Sonymen qatar Qaraǵandyda taǵy eki orta mektep, basqalary Terekti, Shet jáne Ulytaý aýdandarynda paıda bolady.
«Jańa mektepter qurylysynyń arqasynda oqý oryndarynyń sany jetkilikti bolady. Osylaısha biz jumys júktemesi men úsh aýysym máselelerin sheshemiz. Endigi bizdiń basty mindetimiz - 30 jastan asqan mektep ǵımarattaryna kúrdeli jóndeý júrgizý. Qaraǵaılyda «Aýyl - el besigi» jobasy aıasynda ǵımaratty jóndeýge 500 mıllıon teńgege jýyq qarjy bólindi. Dál osyndaı jumys Egindibulaqta josparlanǵan», - dedi Jeńis Qasymbek. Sondaı-aq, oblys ákimi erekshe qajettilikteri bar balalarǵa jaǵdaı jasaý kerektigin aıtty.
Aımaq basshysy qalalar men aýdandardyń ákimderine bir apta ishinde kúrdeli jóndeýdi qajet etetin mektepterdiń tolyq tizimin berýdi tapsyrdy.
Osy protsesti jáne bolashaqta jóndeý barysyn baqylaý úshin Jeńis Qasymbek jumys toptaryn qurýdy tapsyrdy. Olardyń quramyna qamqorshylyq keńes músheleri jáne úkimettik emes uıymdardyń ókilderi kiredi.
