Jezqazǵanda nárestesin qoqys jáshiginde qaldyryp ketken stýdentke qatysty sot úkimi shyqty

Úkimge sáıkes, Gúljaýhar Ǵalıqyzy Ǵalı Qazaqstan Respýblıkasynyń Qylmystyq kodeksiniń 24-babynyń 3-bólimi men 100-babynda kórsetilgen qylmystyq quqyq buzýshylyq jasaǵany úshin kináli dep tanylyp, oǵan osy baptar boıynsha 1 (bir) jyl merzimge bas bostandyǵyn shekteý jazasy taǵaıyndaldy. Atalǵan kodekstiń 44-babynyń talabyna sáıkes, sol merzimge (birjylǵa) probatsııalyq  baqylaý belgilendi. 

«Osy merzim ishinde sottalǵan adamnyń minez-qulqyn baqylaýdy júzege asyratyn ýákiletti memlekettik organǵa habarlamaı, turaqty turǵylyqty jerin, oqýyn aýystyrmaý, ishimdik ishýmen baılanysty kóńil kóteretin jerlerge barmaý mindettelsin»,-dep atap ótilgen úkimde.

Qylmystyq is materıaldaryna qaraǵanda, G. Ǵalı 2015 jyldyń mamyr aıynan bastap N.D.Seıtjan degen jigitpen júrip, sodan ekiqabat bolyp qalǵan. Biraq ol jaǵdaıyn el-jurttan uıalyp jáne áke-sheshesinen qoryqqanynan eshkimge, onyń ishinde jigiti N.Seıtjanǵa da aıtpaǵan. Sodan, 17.05.2016 jyly saǵat 13.40. shamasynda ol óz úıiniń aýlasyndaǵy dárethana ishinde bosanyp qalǵan. Ne isterin bilmeı qatty sasqan ol psıhıkasynyń kúızelýi saldarynan, shala týǵan er balasynan óltirý jolymen qutylǵysy kelgen. Osy maqsatpen, ol jańa týǵan náresteniń kindigin qaıshymen kesip, ony polıetılennen jasalǵan pakettiń ishine salyp, pakettiń aýzyn myqtap baılap, sol ózi turatyn Keńgir eldi mekenininiń Tımırıazev kóshesindegi №18 úıdiń mańaıynda ornalasqan turmystyq qoqystar salýǵa arnalǵan temir jáshiktiń betine qoıyp ketken.

Biraq, kóp uzamaı, atalǵan jáshiktiń mańaıyndaǵy qoqysty jınaýǵa kelgen  kóshe tazalaýshy O.S.Skrynnıkova jáshik ishinen shyqqan balanyń daýsyn estip, paketti ashyp qarap, onyń bireý tastap ketken jańa týǵan  náreste ekenine kózi jetip, tez arada sol aýyldaǵy dárigerlik pýnktke aparǵan. Onyń artynan shaqyrylǵan «Jedel járdem» mashınasy náresteni emhanaǵa jetkizip, tıisti kómek kórsetý nátıjesinde bala ólimnen qutqaryldy.

Basty sot talqylaýynda suralǵan sottalýshy G. Ǵalı  ózine taǵylǵan aıypty tolyqtaı moıyndap, joǵaryda keltirilgen mán-jaıǵa sáıkes keletin mazmunda túsinik berdi. Sondaı-aq, ol osy istegen áreketine shynaıy ókinetinin, osy oqıǵadan keıin N.Seıtjan ekeýi nekege otyrǵanyn, endi balalaryn alyp, ózderiniń baǵyp-qaǵýǵa bel baılap otyrǵandaryn aıtty. Kýáger retinde sot májilisinde suralǵan N.Seıtjan G.Ǵalıdyń bul jaýabyn tolyqtaı bekitip, osy mazmunda túsinik berdi.