Jezqazǵanda nan baǵasy arzandaıdy

QARAǴANDY. QazAqparat - Qaraǵandy oblysynyń Jezqazǵan qalasynda jańa nan zaýyty iske qosyldy. Zamanaýı zaýyt Jezqazǵan, Sátbaev qalalaryn, Qarajal, Jáırem jáne Ulytaý aýdandaryn qamtıtyn bolady. Qýaty  - táýligine 35 tonna nan-toqash ónimderi. Bul nannyń búgingi baǵasyn tómendetýge múmkindik beredi, dep habarlaıdy QazAqparat tilshisi.

«Zaýytty túgelimen jańadan saldyq. Bul iske kóptegen otandyq kompanııalar da at salysty. Naýbaıhananyń shıkizat bazasynyń 100 paıyzy - qazaqstandyq ónimder. Qazir nan-toqash ónimderiniń 19 ataýyn pisire bastadyq, keleshekte ony 50-ge jetkizý maqsatyn qoıdyq», - dedi nan zaýytynyń quryltaıshysy Erlan Nyǵmatýlın.

Nan zaýyty - «Ulytay Nan» JShS-nyń qurylysy 2017 jyldyń tamyz aıynda bastalǵan. Qurylystyń jalpy ýaqyty, montajdaý jáne jóndeý jumystary 8 jarym aıǵa sozyldy. Jobaǵa 2 mıllıard teńge kóleminde qarjy quıyldy. Kásiporynnyń jalpy aýmaǵy 2640 sharshy metrdi quraıdy.

Barlyq protsess mehanıkalandyrylǵan, al pisirilý barysyn arnaıy avtomatıka baqylaıdy.

«Ulytaý nan zaýyty Eýropanyń aldyńǵy qatarly elderiniń zamanaýı energııatıimdi jabdyqtarymen qamtylǵan. Italııa, Frantsııa, Slovakııa men Slovenııadan joǵary tehnologııaly qurylǵylar satyp alyndy.

Qazirgi tańda kásiporynda 225 jańa jumys orny quryldy. Olardyń arasynda múmkindigi shekteýli jandar da bar.

Sondaı-aq, zaýyttyń quryltaıshysy nannyń baǵasynyń sapasyna saı bolýyn kózdeıtinin atap ótti.

«Biz Jezqazǵan dúkenderindegi nannyń ortasha baǵasyn salystyryp kórdik, 105 teńgeni quraıdy. Al bizdiń nan óz dúkenderine 75 teńgeden, al ózge satyp alýshylarǵa 70 teńgeden jetkiziletin bolady. Maqsatymyz - halyqqa tıimdi baǵaǵa saı sapaly ónim shyǵarý», - dedi E.Nyǵmatýllınn.