Jezqazǵanda meshit qurylysy bastaldy
JEZQAZǴAN. KAZINFORM — Jańa meshittiń syıymdylyǵy 3000 adamdy quraıdy.
Qurylys «Qazaqmys korporatsııasy» JShS bastamasymen, Qazaqstan musylmandary dinı basqarmasynyń belsendi qoldaýymen jáne Ulytaý oblysy ákimdigimen ózara túsinistik pen yntymaqtastyq týraly memorandým aıasynda júrgizilýde.
Qurylystyń bastalýyna Bas múftı Naýryzbaı qajy Taǵanuly, «Qazaqmys korporatsııasy» JShS basqarma tóraǵasy Nurahmet Nurıev, Ardagerler keńesiniń, qurylys kompanııasynyń ókilderi jáne jergilikti turǵyndar qatysty.
Joba aıasynda erler men áıelderge arnalǵan bólek zaldar, dáret alatyn oryndar, kitaphana, oqý synyptary, konferents-zal, ákimshilik kabınetter, sondaı-aq avtoturaǵy bar abattandyrylǵan aýmaq qarastyrylǵan.
Meshittiń arhıtektýralyq kelbetinde ulttyq dástúr men zaman talaby eskeriledi.
Qazirgi ýaqytta qurylys alańynda daıyndyq jumysy aıaqtalyp, monolıt quıý jumysy bastaldy. Qurylysty aıaqtaý merzimi 2026 jyldyń tórtinshi toqsanyna josparlanǵan.
Qazirgi baǵalaý boıynsha jobanyń quny 3,2 mlrd teńgeni quraıdy.
«Qazaqmys» korporatsııasy dástúrli túrde áleýmettik ınfraqurylym men rýhanı damýdy nyǵaıtýǵa baǵyttalǵan bastamalaryn júzege asyryp keledi. Jezqazǵanda jańa meshittiń salynýy – kompanııanyń ózi qyzmet etetin óńirlerdi damytýǵa baǵyttalǵan júıeli jumysynyń jalǵasy.
