Jezqazǵanda memlekettik qyzmetshi mas kúıinde kólik júrgizgeni úshin jazalandy
QARAǴANDY. QazAqparat - Jezqazǵan qalalyq soty memlekettik kirister basqarmasy basshysynyń orynbasaryn «Aýdı A6» markaly kóligin mas kúıinde júrgizgeni úshin úsh jyl merzimge kólik quraldaryn júrgizý kýáliginen aıyrdy, dep habarlaıdy «QazAqparat» HAA tilshisi.
Qaraǵandy oblystyq sybaılas jemqorlyqqa qarsy is-qımyl jáne memlekettik qyzmet isteri departamenti Ádep jónindegi keńestiń otyrysynda habarlanǵandaı, Jezqazǵanda sheneýnikti Jezqazǵan ІІB jergilikti polıtsııa qyzmeti jol-patrýldik polıtsııa qyzmetkerleri jolda toqtatqan. Saraptama Asyl Álseıitovtyń «Aýdı A-6» kóligin jeńil deńgeıdegi mas kúıinde júrgizgenin kórsetken. 
Sheneýnik «Ákimshilik quqyq buzýshylyq týraly» kodekstiń 608-baby, ıaǵnı mas kúıinde kólik júrgizgeni úshin júrgizýshi kýáliginen aıyryldy. Budan bólek ol memlekettik qyzmet jelisi boıynsha tártiptik jazaǵa tartyldy.
Oblystyq sybaılas jemqorlyqqa qarsy is-qımyl jáne memlekettik qyzmet isteri departamenti Ádep jónindegi keńestiń músheleri Qaraǵandy oblystyq memlekettik kirister departamentiniń basshylyǵyna Asyl Álseıitovke qatań sógis jarııalaýdy usyndy.
