Jezqazǵanda mektep túlegin óltirgen kúdikti áli kúnge qamaýǵa alynbaǵan
QARAǴANDY. QazAqparat - Jezqazǵanda qaza tapqan mektep túleginiń ata-anasy balasyn óltirgen adamnyń qatań túrde jazalanǵanyn qalaıdy. Olar osy maqsatta qorǵaýshy jaldady. Zardap shekken tarap kúdiktiniń áli de qamaýǵa alynbaǵanyna narazylyq bildirip otyr, dep habarlaıdy QazAqparat tilshisi.
«Kúdikti kámelet jasqa tolmaǵandyqtan jáne buryn-sońdy qylmystyq jaýapkershilikke tartylmaǵandyqtan qamaýǵa alynǵan joq. Ázirge tergeý júrip jatyr, kúdikti úı qamaqta otyr», - dedi qaza tapqan balanyń ápkesi Natalıa Kozlova.
Qaıtys bolǵan balanyń týysynyń aıtýynsha, kúdikti qaza tapqan balany jáı ǵana ıterip qalǵanyn jáne ol qulap, basyn soǵyp alǵanyn aıtqan.
«Bizde birneshe ret basynan soqqy alǵany týraly máıithanadan alynǵan jazba bar. Dál qazir Qaraǵandyǵa jiberilgen saraptamanyń nátıjelerin kútip otyrmyz», - dedi N.Kozlova.
Eske sala keteıik, taıaýda Jezqazǵan kósheleriniń birinen 18 jasar bozbalanyń denesi tabylǵan. Bul oqıǵa mektep bitirý keshinen keıin boldy. Qazir polıtsııa qyzmetkerleri tergeý amaldaryn júrgizip jatyr. Tergeýshiler sot-medıtsınalyq saraptamanyń nátıjesin kútýde.
