Jezqazǵanda qudyqtaǵy gazdan jumysshy qaza tapty
JERQAZǴAN. KAZINFORM — Jezqazǵanda káriz qudyǵynda júrgizilgen jóndeý jumystary kezinde qaıǵyly oqıǵa boldy. Oqıǵa saldarynan kommýnaldyq qyzmettiń bir qyzmetkeri qaza tapty. Taǵy bir jumysshy aýyr jaǵdaıda aýrýhanaǵa jetkizilip, dárigerler onyń jaǵdaıyn óte aýyr dep baǵalap otyr.
Qaıǵyly oqıǵa káriz júıesin tazalaý kezinde tirkelgen. Jabyq keńistikte qaýipti gazdyń kenetten bólinýi saldarynan 44 jastaǵy kommýnaldyq kásiporyn qyzmetkeri kóz jumdy. Aldyn ala málimet boıynsha, josparly jumys barysynda oryn alǵan tótenshe jaǵdaıda ýly gazdyń taralýy adam ómirine qaýip tóndirgen.
Kýágerler men aldyn ala derekterge sáıkes, qudyq ishinde eki jumysshy bolǵan. Ekeýi de belgisiz zattyń, boljam boıynsha metan gazynyń áserine ushyraǵan. 1982 jyly týǵan qyzmetker oqıǵa ornynda qaza tapsa, 1986 jyly týǵan ekinshi jumysshy shuǵyl túrde medıtsınalyq mekemege jetkizilgen.
Dárigerler naýqastyń aýrýhanaǵa óte aýyr jaǵdaıda, tynys alý jetkiliksizdigi belgilerimen túskenin atap ótti. Ol birden jansaqtaý bólimine jatqyzylǵan.
— Naýqas keshki ýaqytta qabyldaý bólimine aýyr jaǵdaıda, tynys alý jetkiliksizdigi belgilerimen jetkizildi. Qajetti medıtsınalyq kómekten keıin jaǵdaıy turaqtanyp, tańerteń nefrologııa bólimine aýystyryldy, — dedi oblystyq aýrýhananyń bólim meńgerýshisi Dmıtrıı Ýgrıýmov.
Keıin Ulytaý oblysy ákimdigi oqıǵaǵa qatysty resmı túsinikteme berip, jumysshylardyń kommýnaldyq kásiporynǵa tıesili ekenin naqtylady.
— 2026 jylǵy 20 mamyr kúni shamamen 16:40–ta Abaı men Chehov kósheleriniń qıylysynda «Jylý-sý sharýashylyǵy kásiporny» AQ qyzmetkerleriniń qatysýymen jazataıym oqıǵa boldy. Aldyn ala derekter boıynsha, káriz qudyǵyn tazalaý kezinde gaz bólingen. 1982 jyly týǵan qyzmetker oqıǵa ornynda qaza tapty, 1986 jyly týǵan ekinshi qyzmetker jedel járdemmen medıtsınalyq mekemege jetkizildi. Qazirgi tańda oqıǵanyń sebep-saldary men keltirilgen jaraqattardyń aýyrlyǵy anyqtalýda. Atalǵan derek boıynsha QR QK-niń 156-baby 3-bóligimen qylmystyq is qozǵaldy. Jaǵdaı tıisti organdardyń baqylaýynda, — delingen ákimdik habarlamasynda.
Qazir eńbek qaýipsizdigi talaptarynyń saqtalýy men qaıǵyly oqıǵanyń naqty sebepteri boıynsha tergeý amaldary júrgizilýde. Oqıǵanyń barlyq mán-jaıy anyqtalý ústinde.
Buǵan deıin Qaraǵandyda jazataıym jaǵdaı saldarynan sheteldik stýdenttiń qaza tapqany týraly habarlanǵan bolatyn.
Osyǵan deıin «Kaztsınkte» qaza bolǵan 2 jumysshynyń otbasyna 10 jyldyq jalaqysyna teń ótemaqy tólenetinin habarlaǵan bolatynbyz.
