Jezqazǵanda kommýnaldyq jelilerdi jóndeý kezinde jumysshy qaza tapty

JEZQAZǴAN. KAZINFORM - Jezqazǵanda jer qazý jumystary barysynda merdiger uıymnyń qyzmetkeri kóz jumdy. Oqıǵa 8 qazan kúni shamamen saǵat 14:00-de Temirjolshylar kóshesinde bolǵan.

Qala ákimdiginiń málimetinshe, tótenshe jaǵdaı Temirjolshylar kóshesi, 21- 23 mekenjaıyndaǵy káriz jelilerin jóndeý kezinde tirkelgen. Atalǵan jumystardy Jezqazǵan qalasy ákimdiginiń turǵyn úı-kommýnaldyq sharýashylyǵy bólimimen jasalǵan kelisimshart aıasynda «Bektan» JShS oryndap jatqan.

Aldyn ala málimetter boıynsha, 1975 jyly týǵan jumysshy jer qazý barysynda shamamen eki metr tereńdikte topyraq astynda qalyp qoıǵan. Oqıǵa ornyna jetken jedel járdem qyzmeti er adamnyń ómirin saqtap qalý múmkin bolmaǵanyn aıtty.

Qala ákimdigi marqumnyń otbasy men jaqyndaryna qaıǵyryp kóńil aıtty. Qaıǵyly oqıǵanyń sebep-saldaryn anyqtaý maqsatynda arnaıy komıssııa quryldy.

Ulytaý oblysynyń polıtsııa departamenti bul derek boıynsha Jezqazǵan qalasy polıtsııa basqarmasynda QR Qylmystyq kodeksiniń 156-baby 3-bóligi — «Eńbekti qorǵaý talaptaryn buzý, adam ólimine ákep soǵý» baby boıynsha qylmystyq is qozǵalǵanyn habarlady.

Aıta keteıik, 1 qazan kúni Qaraǵandyda da osyndaı jaǵdaı tirkelgen edi: káriz qubyrlaryn jóndeý kezinde 18 jastaǵy jigit pen 41 jastaǵy áriptesi opyrylǵan topyraq astynda qalyp, mert bolǵan.