Jezqazǵanda «Qazaqmystyń» jumysshysy mert boldy
ASTANA. QazAqparat - Jezqazǵanda óndiristegi jazataıym oqıǵa saldarynan «Qazaqmys» kompanııasynyń jumysshysy mert boldy, dep habarlaıdy QazAqparat tilshisi uıymnyń baspasóz qyzmetine silteme jasap.
«Qazaqmys» kompanııasy 21 aqpan kúni Jezqazǵandaǵy №№ 1, 2, 3 baıytý fabrıkalarynyń aýmaǵynda bolǵan jazataıym oqıǵa týraly azaly túrde habarlaıdy. Ortalyq qoımadan materıaldar jetkizý tapsyrmasyn oryndaý kezinde 1994 jyly týǵan jumysshy kabel barabanyn qosalqy stantsııanyń garajyna kirgizip jatqanda jaraqat aldy», - delingen habarlamada.
Zardap shekken jumysshy Jezqazǵan qalasynyń medıtsına ortalyǵyna jetkizilgen, ókinishke qaraı, ota jasalǵan soń, aýyr jaraqattardyń saldarynan qaıtys boldy.
Oqıǵanyń mán-jaıy anyqtalyp jatyr. Tergep-tekserý jóninde arnaıy komıssııa jasaqtaldy. «Qazaqmys korporatsııasy» JShS basshylyǵy men eńbek ujymy qaıtys bolǵan jumysshynyń týystary men jaqyndaryna, qaıǵysyna ortaqtasyp, kóńil aıtady.
