Jezqazǵanda qaza tapqan turǵynnyń telefonynan kredıt rásimdegen polıtseıler sottaldy
JEZQAZǴAN. QazAqparat – Jol-kólik oqıǵasynan qaza bolǵan júrgizýshiniń uıaly telefonyn urlaǵan eki polıtseı sottaldy. Jezqazǵan qalalyq soty urlyq, laýazymdyq ókilettikterin asyra paıdalaný jáne alaıaqtyq jasady degen aıyppen ustalǵan burynǵy tártip saqshylaryna úkim shyǵardy, dep habarlaıdy QazAqparat tilshisi.
Ótken jyldyń kókteminde Jergilikti polıtsııa basqarmasynyń eki krımınalısti jol apaty bolǵan Jezqazǵan – Sátbaev jolyna shaqyrtylǵan. Oqıǵa ornynda polıtsııa qyzmetkerleri qaza tapqan júrgizýshiniń uıaly telefonyn taýyp alǵan. Ony zattaı dálel retinde tapsyrýdyń ornyna polıtseı telefondy alyp ketken. Keıin mobıldik qosymsha arqyly telefon ıesiniń atyna mıkrokredıtter resimdegen. Sońyra shotqa túsken aqshany dosynyń kartasyna aýdarǵan.
Biraz ýaqyttan keıin olardyń alaıaqtyq áreketi anyqtaldy. Kúdiktiler prokýrormen is júrgizý kelisimin jasap, óz kinásin tolyq moıyndady. Jezqazǵan qalalyq soty olardy 3,6 jylǵa bas bostandyǵyn shekteý týraly úkim shyǵardy. Sondaı-aq, sot olardy arnaýly ataǵynan aıyrdy.
«Baıandalǵandy negizge ala otyryp, sot sottalýshylardy kináli dep tanydy jáne birinshi sottalýshyǵa 3 jyl 6 aı bas bostandyǵyn shekteý túrindegi jaza taǵaıyndady. Bul rette ol ómir boıy memlekettik qyzmette jumys isteý quqyǵynan, sondaı-aq polıtsııa leıtenanty arnaýly ataǵynan aıyryldy. Ekinshi sottalýshyǵa polıtsııa aǵa leıtenanty arnaýly ataǵynan aıyra otyryp, 3 jyl 6 aı bas bostandyǵyn shekteý jazasy taǵaıyndaldy. Úkim zańdy kúshine endi», - dedi Jezqazǵan qalalyq sotynyń baspasóz qyzmeti.
