Jezqazǵanda qaıtarylǵan aktıvter esebinen ambýlatorııa salyndy
ASTANA. KAZINFORM — Jezqazǵan qalasyna qarasty Keńgir kentinde zańsyz shyǵarylǵan aktıvterdi memleketke qaıtarý jumystary aıasynda bıýdjetke túsken qarajat esebinen salynǵan dárigerlik ambýlatorııanyń ashylý rásimi ótti.
Ulytaý oblystyq prokýratýrasynyń baspasóz qyzmeti málim etkendeı, atalǵan joba qaıtarylǵan aktıvterdi áleýmettik mańyzy bar mindetterdi sheshýge jáne azamattardyń ómir súrý sapasyn arttyrýǵa tıimdi paıdalanýdyń kezekti jarqyn úlgisi boldy.
— Jańa densaýlyq saqtaý nysany kent turǵyndaryn qoljetimdi ári sapaly alǵashqy medıtsınalyq-sanıtarııalyq kómekpen qamtamasyz etip, qajetti medıtsınalyq qyzmetterdi ýaqytyly alýǵa, profılaktıkalyq tekserýlerden ótýge jáne turǵylyqty jeri boıynsha mamandardyń baqylaýynda bolýǵa múmkindik beredi. Ambýlatorııany paıdalanýǵa berý halyq úshin medıtsınalyq kómektiń qoljetimdiligin edáýir arttyrýǵa, medıtsınalyq qyzmet kórsetýge qolaıly jaǵdaı jasaýǵa jáne óńirdiń densaýlyq saqtaý júıesin nyǵaıtýǵa yqpal etedi, — delingen taratylǵan aqparatta.
Memleket zańsyz shyǵarylǵan aktıvterdi qaıtarýǵa jáne olardy qoǵam ıgiligi úshin paıdalanýǵa baǵyttalǵan saıasatty júıeli túrde júzege asyryp keledi. Bıýdjetke qaıtarylǵan qarajat densaýlyq saqtaý, bilim berý jáne kommýnaldyq sala nysandaryn qosa alǵanda, áleýmettik ınfraqurylym obektilerin salýǵa jáne jańǵyrtýǵa baǵyttalyp otyr.
Qaıtarylǵan aktıvter esebinen áleýmettik jobalardy iske asyrý jumystary aldaǵy ýaqytta da jalǵasyp, azamattardyń ál-aýqatyn arttyrýǵa jáne elimizdiń óńirlerin damytýǵa óz úlesin qosa beredi.
Buǵan deıin Jezqazǵan qalasynyń bıýdjeti men ınvestıtsııalyq áleýeti artyp kele jatqanyn jazǵanbyz.
