Jezqazǵanda qaraýsyz qalǵan «Jastar» saıabaǵy qalpyna keltirilip jatyr
ASTANA. QazAqparat - Jezqazǵan qalasynda «Jastar» saıabaǵyn qaıta qalypqa keltirý jumystary bastaldy. Kezinde bul qala turǵyndarynyń súıikti demalys orny bolatyn, alaıda ýaqyt óte kele saıabaq qaraýsyz qalǵan, dep habarlaıdy oblystyq ákimdiktiń baspasóz qyzmeti.
«Jaǵdaıdy túzeý úshin úsh jyldyq merzimde saıabaqty qalypqa keltirý týraly sheshim qabyldandy. Jobanyń jalpy smetalyq quny 296,7 mln teńgeni quraıdy. Bul somaǵa saıabaq aýmaǵyn abattandyrý boıynsha aýqymdy jumys atqarý kózdelip otyr. Joba aıasynda sý burqaq jóndelip, arkanyń metall qurylysyn qaptaý, balalardyń oıyn alańqaıy men sport alańdaryn ornatý jáne aǵash otyrǵyzý qarastyrylady», - dep habarlady Jezqazǵan qalasy ákiminiń baspasóz-qyzmeti.
Saıabaqta rollerdrom, skalodrom jabdyqtaý josparlanyp otyr. Graffıtı salýshylarǵa shyǵarmashylyqtaryn shyńdaý úshin jeke aýmaq qarastyrylady.
2017-shi jyly jobanyń birinshi kezeńin júzege asyrý úshin oblystyq bıýdjetten 50 mln teńge bólingen. Bas merdiger - «Qurylys» fırmasy. Qazirgi tańda saıabaqta tas tóseýishter salynyp, jaryqtandyrý baǵanalary, qorshaýlar jáne sýarý júıesi ornatylyp jatyr.
Jezqazǵan qalasynyń ákimi Batyrlan Ahmetov saıabaqty qalpyna keltirý jumystarymen tanysty. Shahar basshysy demalys ornyna kirer jerde kólikterge arnalǵan turaqtar jasaýdy tapsyrdy. Sonymen qatar kireberiste ásem arka ornatýdy surady.
«Smetada arka bolmasa da qala turǵyndary úshin jaqsylyq jasap, ony ornata salyńyzdar, - dedi bas merdigerge Batyrlan Ahmetov. - Negizi sizder úlken jumys atqardyńyzdar, endi isti sońyna deıin aparý kerek. Sý burqaq ornatylady, qýrap qalǵan ósimdikterdi alyp tastap, eki myń kóshet otyrǵyzamyz. Jańartylǵan saıabaq qala turǵyndarynyń súıikti demalys ornyna aınalady dep oılaımyn».
Sonymen qatar Jezqazǵanda «Ǵaryshty baǵyndyrýshylar» monýmenti jańartyldy. Músindik qurylysty jóndeýge jáne syrlaýǵa 5,9 mln teńge jumsaldy. Qarajat jergilikti bıýdjetten bólindi.
