Jezqazǵanda isten shyqqan eki qazandyqtyń biri iske qosyldy

JEZQAZǴAN. QazAqparat - Jezqazǵan qalasynyń basshylyǵy isten shyqqan eki qazandyqtyń bireýi túnde iske qosylǵanyn habarlady. Qazirgi tańda jylý-elektr ortalyǵynda 4 qazandyq pen 3 týrboagregat jumys istep tur, dep habarlaıdy QazAqparat tilshisi.

Jezqazǵan qalasy ákiminiń málimdeýinshe, túngi 03.54-te 6-shy týrbogenerator, al tańǵy 04.30-da qazandyq agregaty iske qosylǵan.

Qazir Jezqazǵandaǵy úıler men áleýmettik nysandar 4 qazandyq arqyly jylytylyp otyr.

«Qazirgi ýaqytta 4 qazandyq (No6,7,9,11), sonymen qatar 3 týrboagregat (6,7,8) jumys istep tur. JEO-dan jylý bekitilgen temperatýralyq kestege sáıkes shyǵarylady. JEO shtattyq rejımge kirdi», - dep málim etti ákimdik.

Búgin sınoptıkterdiń boljamynsha Jezqazǵanda aýa temperatýrasy -8 gradýsqa deıin tómendeıdi.

Turǵyndardyń aıtýynsha, páterler endi ǵana jylı bastady.

Eske sala keteıik, keshe Jezqazǵan JEO eki qazandyǵy isten shyǵyp, páterlerdegi temperatýra normadan 9 gradýsqa tómendep, nebári 13 gradýsty quraǵan.