Jezqazǵanda ınvestorlar forýmy ótkizilmek
ASTANA. QazAqparat - Jezqazǵan óńirine ınvestorlardy jumyldyrý úshin qala basshylyǵy ınvestforým ótkizýdi josparlap otyr. Al oblys ákimi bul máselege anaǵurlym jaýapty qarap, tyńǵylyqty daıyndyq jasaýdy tapsyrdy, dep habarlaıdy Qaraǵandy oblysy ákimdiginiń baspasóz qyzmeti.
«Ideıa, árıne, jaqsy. Alaıda oǵan tek jergilikti kásipkerler men ınvestorlardy shaqyratyn bolsańyzdar, odan paıda bolmaıdy, - dedi aımaq basshysy Erlan Qoshanov Jezqazǵan aımaǵyn damytýdyń úsh jyldyq josparynyń oryndalýy boıynsha jınalys barysynda. - Tyńǵylyqty daıyndalý kerek, jaqyn jáne alys shet elderden ınvestorlardy shaqyrý qajet. Jergiliktiler onsyz da Jezqazǵannyń damýyna qatysty jumystardy biledi jáne sol baǵytta qyzmet istep jatyr. Men ózimniń orynbasarym Almas Aıdarovqa jáne ónerkásip, kásipkerlk basqarmalarynyń basshylaryna bul máselemen aınalysýdy tapsyramyn. Eger daıyndyq jumystaryna qosymsha ýaqyt qajet bolsa, forýmdy sál keshirek merzimge jyljytyńyzdar.
Jezqazǵan aımaǵyn damytýdyń úsh jyldyq josparyna qatysty atqarylyp jatqan sharalardy talqylaý barysynda aımaq basshysy keıbir máseleler boıynsha eskertýler jasady, onyń qatarynda kásipkerlikti damytý salasy boldy.
Sonymen qatar aımaq basshysy «Rýhanı jańǵyrý» baǵdarlamasyn oryndaý boıynsha jumystardy údetýdi tapsyrdy.
