Jezqazǵanda Geologııalyq klaster ashyldy
JEZQAZǴAN. KAZINFORM – Jezqazǵan qalasynda geologııa salasyn damytý jáne el ekonomıkasynyń negizgi sektorlary úshin bilikti kadrlar daıarlaý maqsatynda Geologııalyq klasterdiń resmı ashylýy ótti. Bul týraly Ǵylym jáne joǵary bilim mınıstrligi habarlady.
Іs-sharaǵa QR Ǵylym jáne joǵary bilim mınıstri Saıasat Nurbek, Ulytaý oblysynyń ákimi Dastan Ryspekov, QR Parlamenti depýtattary, «Qazaqmys korporatsııasy» JShS ókilderi, sondaı-aq salanyń jetekshi mamandary, ýnıversıtetterdiń professorlyq-oqytýshylyq quramy jáne halyqaralyq seriktester qatysty.
Geologııalyq klaster negizinde jańa Ulytaý ýnıversıtetin qurý josparlanyp otyr. Ýnıversıtet geologııa, mıneraldyq ınjenerııa jáne baılanysty salalar boıynsha mamandardy daıarlaýǵa baǵyttalady.
Jobada sonymen qatar AQSh-taǵy taý-ken isi men ınjenerlik ǵylymdar salasyndaǵy jetekshi joǵary oqý oryndarynyń biri Colorado School of Mines ýnıversıteti qatysady.
Bul eń ozyq halyqaralyq bilim berý tájirıbesin ıntegratsııalaýǵa, birlesken ǵylymı-zertteý jobalaryn júzege asyrýǵa jáne jahandyq deńgeıde básekege qabiletti kadrlar daıarlaýǵa múmkindik beredi.
Aıta keteıik, Bektenov Geologııalyq klaster quramynda zamanaýı zerthana qurylysyn 2026 jyly bastaýdy tapsyrdy.
Elimizde geologııalyq barlaýǵa tartylatyn ınvestıtsııa kólemi jetkiliksiz. Mundaı pikirdi Májilistiń jalpy otyrysynda depýtat Edil Jańbyrshın bildirdi.