Jezqazǵanda eski fabrıka ǵımaraty kásipkerlerge beriledi

JEZQAZǴAN. KAZINFORM — Ulytaý oblysynda jyl basynan beri shaǵyn jáne orta bıznes sýbektileri 160,6 mlrd teńgege ónim óndirip, 19,8% ósim kórsetken. Bul týraly óńir ákimi Dastan Ryspekov eseptik kezdesýinde aıtty. 

Ákimniń aıtýynsha, shaǵyn jáne orta bıznestiń jalpy óńirlik ónimdegi úlesi 6,9%. Al óńir qurylǵan jyly bul kórsetkish nebári 3,8% bolǵan edi.

— Jumyspen qamtylǵandar sany 2,7%-ǵa artyp, 30,8 myń adamǵa jetti. «Atameken» ulttyq kásipkerler palatasynyń reıtıngi boıynsha, oblys shaǵyn bıznesti damytýǵa eń qolaıly aımaqtardyń úshtigine kiredi. Bıyl jas kásipkerlerge bıznesin bastaý úshin 195 memlekettik grant berildi, — dedi Dastan Ryspekov elordada Ortalyq kommýnıkatsııalar qyzmetinde.

Sondaı-aq bıyl jalpy quny 3 mlrd teńge bolatyn 75 jańa kásipkerlik nysany ashylǵan.

Odan bólek, álemdik jáne otandyq brendterdiń franshızalarynyń sany ósken. Atalǵan baǵyttaǵy jumystar oblystyń áleýmettik jáne ekonomıkalyq áleýetin arttyrady jáne bul bastamalar kezeń-kezeńimen jalǵasatyn bolady.

— Óńirdegi kásipkerlikti damytýdyń perspektıvaly baǵyttarynyń biri — shaǵyn ónerkásiptik aımaq pen ınvestorlar úıin qurý. Onda óńirdiń barlyq qarjy ınstıtýty kásipkerlerge yńǵaıly bolý úshin bir jerde ornalasady. Osy maqsatta 25 jyldan astam qaraýsyz qalǵan eski trıkotaj fabrıkasynyń ǵımaraty memleket menshigine qaıtaryldy. Qazirgi ýaqytta ǵımarattyń shatyry, terezeleri jáne qasbeti jańartylyp jatyr, — dedi Dastan Ryspekov.

Aıta keteıik, Ulytaý oblysynyń bıýdjeti 30 mlrd teńgege artty.