Jezqazǵanda er adamnan 300-den astam kıik múıizi tárkilendi

JEZQAZǴAN. KAZINFORM — «Kıik — 2025» jedel aldyn-alý is sharasy aıasynda Ulytaý oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri zańsyz saqtalǵan kıik múıizderin anyqtady. 

Jedel is-sharalar barysynda 53 jastaǵy azamattan 322 kıik múıizi, sondaı-aq atalǵan janýardyń ólekseleri tárkilendi.

Er adamnyń aıtýynsha, 2024 jyldan bastap osy ýaqytqa deıin ol dala aýmaǵynda kıik múıizderin jınap, keıinnen satý maqsatynda úıiniń shatyrynda saqtaǵan.

Qazirgi ýaqytta atalǵan derek boıynsha keshendi tergeý is-sharalary júrgizilip jatyr. Oqıǵanyń barlyq mán-jaıy jáne zańsyz áreketterge qatysy bar ózge de tulǵalar anyqtalyp jatyr.  

Aıta ketelik Qazaqstan kıik múıizin eksporttaıtyn boldy.