Jezqazǵanda burynǵy bıznes seriktesterdiń múlik daýy ólimmen aıaqtaldy

JEZQAZǴAN. QazAqparat - 22 tamyzda Jezqazǵan qalasynyń polıtsııa basqarmasynyń kezekshi bólimine eki qabatty úıdiń páterinde kisi ólimi bolǵany týraly habarlama tústi, dep habarlaıdy QazAqpara Polisia.kz telegram-arnasyna silteme jasap.

Oqıǵa ornyna jetken jedel-tergeý toby máıittiń 54 jastaǵy qala turǵynyna tıesili ekenin anyqtady.

Krımınaldyq polıtsııa qyzmetkerleri jedel-izdestirý sharalary barysynda 60 jastaǵy qala turǵynyn ustady. Kúdiktiniń aıtýynsha, marqum onyń bıznestegi burynǵy seriktesi bolǵan. Keıin ózara bıznesti jaýyp, dúnıe-múlikti bólisken. Osynyń negizinde er adamdar arasynda birneshe jylǵa sozylǵan janjal týyndaǵan.

Kúdikti garajda ańshy myltyǵyn tazalap otyrǵan kezde seriktesiniń aýlaǵa shyqqanyn kórip, ony atyp tastaǵan.

Atalǵan fakti boıynsha sotqa deıingi tergeý amaldary bastaldy. Kúdikti ýaqytsha ustaý ızolıatoryna qamaldy.