Jezqazǵanda birneshe urlyq jasaǵan aǵaıyndy kúdiktiler ustaldy

ASTANA. KAZINFORM – Jezqazǵan qalasynda birqatar urlyqqa qatysy bar kúdiktiler ustaldy, dep habarlaıdy Polisia.kz.

Qalalyq polıtsııa basqarmasynyń málimetinshe, jedel-izdestirý sharalary barysynda 63 jáne 59 jastaǵy aǵaıyndy eki turǵyn anyqtalyp, qamaýǵa alyndy.

Tergeý barysynda olardyń 2025 jyldyń tamyz-qazan aılary aralyǵynda dúkenderden, sulýlyq salondarynan jáne turǵyn úılerden aqsha, uıaly telefon, bank kartalary men baǵaly zattardy urlaǵany belgili boldy.

Jábirlenýshilerge keltirilgen materıaldyq shyǵyn 1,5 mıllıon teńgeden asty. Qazirgi ýaqytta kúdiktiler ýaqytsha ustaý ızolıatoryna qamaldy.

Polıtsııa qyzmeti turǵyndardy jeke múlikterin qaraýsyz qaldyrmaýǵa jáne saqtyq sharalaryn saqtaýǵa shaqyrady.

Aıta keteıik, bıyl Ulytaý oblysy aýmaǵynda mal urlyǵy 30%-ǵa tómendegen.