Jezqazǵanda balalar men jasóspirimder sport akademııasy salynady
JEZQAZǴAN. QazAqparat – 2019 jyly Serik Kerimbekov negizin qalaǵan Namys SK qoǵamdyq qory Jezqazǵanda jasóspirimderge arnalǵan sport ınternatynyń qurylysyn bastady. Onda sport túrlerine arnalǵan jańa keshen jáne 200 oryndyq jataqhana ashylady, dep habarlaıdy QazAqparat tilshisi.
Qor Jezqazǵanda jalpy bilim beretin mektepter men balalar úılerine kómek kórsetýiniń arqasynda jergilikti turǵyndar arasynda burynnan belgili. Balalarǵa syılyq retinde tennıs ústelderi men túrli sport qural-jabdyqtaryn bergen.
Eki jyl buryn Namys SK dál osyndaı ataýmen sport keshenin ashty. Sektsııalarda jattyǵý tegin. Jas sportshylarǵa sport formasy beriledi, al mańyzdy sport jarystaryndaǵy jeńister mindetti túrde qoldaý tabady. Keshenniń negizgi baǵyty - jekpe-jek. Qazaq kúresi, boks, sambo, dzıýdo, erkin jáne grek-rım kúresi, áıelder kúresi, fýtbol, voleıbol, ústel tennısi sııaqty sport túrleri boıynsha 10 sektsııa jumys isteıdi. Keshenge myńnan astam bala keledi. Namys SK tárbıelenýshileri tek qalanyń ǵana emes, sondaı-aq eldiń maqtanyshy. Olar birneshe dúrkin júldegerler jáne respýblıkalyq jarystardyń jeńimpazdary.
«Bizdiń qordyń negizgi baǵyty - buqaralyq sportty damytý. Biz salaýatty jastardy tárbıelep, jasóspirimderdiń boıyna salaýatty ómir saltyn sińirgimiz keledi. Barlyq balalar kásibı sportty tańdaı bermeıdi, biraq balalyq shaǵynda jattyqqan barlyq uldar men qyzdar tabandylyq, tártiptilik, jaýapkershilik jáne qoıylǵan maqsattarǵa qol jetkizýge degen umtylys sııaqty qasıetterge ıe bolatyny haq», – dep esepteıdi Namys SK qoǵamdyq qorynyń bas dırektory Qadyr Nurlanov.
Jezqazǵan ákimi Qaırat Ábsattarov pen Namys SK negizin qalaýshy Serik Kerimbekovtiń qatysýymen bolashaq sport akademııasynyń irgetasyna ýaqyt kapsýlasyn saltanatty túrde qalaý rásimi ótti.
«140 adamǵa arnalǵan kórermen minbelerimen oıyn zaly salynady. Voleıbol, basketbol, fýtbol boıynsha respýblıkalyq mańyzy bar týrnırler ótkizýge bolady. Tipti kúres, boks jarystaryn uıymdastyrýǵa múmkindik týady. Biz qoldanystaǵy sport keshenine qosalqy ǵımarat salyp, keńeıtemiz. Onda sheshinetin bólmelerdi, trenajer jáne gımnastıka zaldaryn, ústel tennısine arnalǵan zaldy ornalastyramyz», – dedi Qadyr Nurlanov.
Sport keshenine jaqyn jerde 200 oryndyq jataqhana salynady. Onda jasóspirimderge qajetti nárseniń barlyǵy eskeriledi. Kompıýter synyby, ashana, kir jýý jáne útikteýge arnalǵan bólme, sabaqqa daıyndalý bólmesi bolady. Barlyq tárbıelenýshi tamaqpen, sport jabdyǵymen jáne qural-jabdyqpen, oqý ádebıetimen qamtamasyz etiledi. Olar tek sportpen aınalysyp qana qoımaı, jaqyn mańdaǵy jalpy bilim beretin mektepterge barady.
Jańa sport ınternatyna Ulytaý jáne Jańaarqa aýdandarynan, sondaı-aq Sátbaev pen Arqalyqtan balalardy tartý josparlanyp otyr. Shalǵaı aýyldardyń balalaryna erekshe kóńil bólinedi. 10–16 jas aralyǵyndaǵy balalar qabyldanady.
Qadyr Nurlanovtyń aıtýynsha, barlyq nysandardyń qurylysy kelesi jyly aıaqtalýy tıis.
