Jezqazǵanda avtobýstyń ishinde eki adam áskerı qyzmetshilerdi pyshaqtady
JEZQAZǴAN. QazAqparat – Jezqazǵan qalasynda eki adam avtobýsty qýyp jetip, salondaǵy áskerı qyzmetkerlerge pyshaqpen shabýyl jasady, dep habarlaıdy QazAqparat tilshisi.
29 aqpanda «Hıýndaı» avtokóligimen belgisiz eki azamat Jezqazǵan qalasynan Sátpaevqa bet alǵan marshrýttyq avtobýsty «Keńgir kenti» aıaldamasynda toqtatyp, salon ishine kirip, janjal shyǵarǵan. Qoǵamdyq kólikte buzaqylar QR ІІM Ulttyq gvardııasynyń eki áskerı qyzmetkerine pyshaq salǵan. Pyshaq jaraqatyn alǵan áskerı qyzmetshiler aýrýhanaǵa jetkizildi, biraq qajetti kómek kórsetilgen soń úıine jiberligen.
«Jedel-izdestirý barysynda Jezqazǵan qalasy PB polıtsııa qyzmetkerleri Sátpaev qalasynyń 32-37 jastaǵy eki turǵynyn ustady. Olardan zattaı dálel retinde pyshaq tárkilendi. Atalmysh derek boıynsha QK 293-baby 3-bólimi boıynsha sotqa deıingi tergeý bastaldy», – dep habarlady Qaraǵandy oblysy PD baspasóz qyzmeti.
Kýágerlerdiń aıtýynsha, áskerı qyzmetshiler avtobýstaǵy qyzdy mas buzaqydan qorǵap, ony avtobýstan shyǵaryp jibergen. Soǵan eregisken ol pyshaq alyp, dosyn kómekke shaqyryp, qoǵamdy kólikti qýyp jetip, avtobýs salonynda áskerılerge shabýyl jasaǵan.
