Jezqazǵanda Abaı týraly spektakldiń premerasy ótti
Spektaklde Abaı men Qunanbaıdyń, áke men balanyń arasyndaǵy kúrdeli ózara qarym-qatynas arqyly aq pen qaranyń, jaqsylyq pen jamandyqtyń sheksiz qarama-qaıshylyǵy sııaqty kúrdeli máseleler kórinis tapqan.
«Uly Aqynnyń 175 jyldyǵyna arnalǵan spektakl arqyly kórermenderdiń nazaryn Abaı ómiriniń fılosofııasy men tragedııasyna taǵy da aýdarǵym keldi. Ekinshiden, basqalarǵa múldem uqsamaıtyn «óz Abaıymdy» qoıǵym keldi. Biz Abaı – fılosof, danyshpan deımiz. Alaıda, ol bárimiz sııaqty et pen qannan jaralǵan adam. Biraq men onyń progressıvti oılarymen óz zamanynan ozǵanyn kórsetkim keldi. Iá, tipti týystary men jaqyn-jekjattary onyń janyn tolyq túsine almady. Sondaı-aq, ómir boıy nadandyqpen, ótkenniń qaldyqtarymen kúresken Abaıdy kórsetkim keldi», - deıdi qoıýshy rejısser Temirjan Janbotaev.
Sahnada Abaı beınesin eki akter somdady: Nurjan Beıisbekov jas aqynnyń mineziniń qalyptasýyn jetkizdi, al QR eńbek sińirgen ártisi Serik Bulǵaqbaev qalyptasqan uly oıshyldyń san qyrly tulǵasyn qaıta jańǵyrtty.
«Bizdiń qala úshin – bul úlken oqıǵa, úlken premera. Abaıdy oınaý - kez kelgen qazaqstandyq akterdiń armany dep oılaımyn. Biz barynsha tyrystyq, qıyndyqtar boldy. Bizdiń qoıylym kórermen kóńilinen shyqty dep úmittenemiz», - dedi Nurjan Beısbekov.
Atalmysh pesa 40 jyl buryn jazylǵan.
«Abaıdyń 150 jyldyǵyna oraı Máskeýde boldy. Elimizdiń kóptegen teatrlarynda qoıyldy. Biraq S. Qojamqulov atyndaǵy teatrdyń spektakli meni erekshe tolqytty. Men sahnalarda túrli Qunanbaı obrazdaryn kórdim – barlyǵynda ol qatal adam beınesinde somdalady. Biraq Qunanbaıdyń da júregi bar, ol da ulyna alańdaıdy. Búgin men Baqytjan Ybyraevtyń oryndaýynda osyndaı beıneni kórdim», - dep atap ótti QR Memlekettik syılyǵynyń laýreaty, aqyn, jazýshy-dramatýrg Iran-Ǵaıyp.
Abaı murasyn nasıhattaǵany úshin teatr basshysy Doshan Sáken «Men ishpegen ý bar ma?..» spektakliniń qoıýshy rejıseri Temirlan Janbotaevqa Abaı atyndaǵy Halyqaralyq mádenıet pen ónerdi qoldaý qorynyń «Abaı Qunanbaevtyń 175 jyldyǵy» mereıtoılyq medalin tabys etti. Bul marapatqa sondaı-aq Serik Bulǵaqbaev Abaı beınesin somdaǵany úshin, al Baqytjan Ybyraev Qunanbaı rólin oınaǵany úshin ıe boldy.
