Jezqazǵanda 6 myń kórermenge arnalǵan jabyq fýtbol stadıony salynady
JEZQAZǴAN. KAZINFORM – Ulytaý oblysynyń ákimdigi men «Qazaqmys» korporatsııasy óńirdegi sport ınfraqurylymyn damytýǵa baǵyttalǵan yntymaqtastyq týraly memorandýmǵa qol qoıdy. Kelisim aıasynda Jezqazǵanda 6 myń kórermenge arnalǵan jabyq fýtbol stadıony men zamanaýı tennıs ortalyǵyn salý josparlanyp otyr.
Mańyzdy kelisimge Ulytaý oblysynyń ákimi Eset Baıken men «Qazaqmys korporatsııasy» JShS Basqarma tóraǵasy Rýslan Óskenáli qol qoıdy.
Memorandým aıasynda Jezqazǵan qalasynda 6 myń kórermenge arnalǵan jabyq fýtbol stadıony men zamanaýı tennıs ortalyǵyn salý josparlanǵan.
– Bul jobalar qala turǵyndaryna, ásirese balalar men jastarǵa sportpen turaqty túrde aınalysyp, óz qabiletterin damytýǵa jańa múmkindikter beredi. Jalpy, Memleket basshysynyń tapsyrmalaryna sáıkes, bıyl jáne 2027 jyly óńirimizde áleýmettik jáne ınjenerlik ınfraqurylymnyń 25-ten astam iri nysanynyń qurylysy bastalady. Bizdiń basty mindetimiz – oblysqa ınvestıtsııa tartý qarqynyn saqtap, júzege asyrylyp jatqan jobalardyń nátıjesi halyq úshin naqty sezilýin qamtamasyz etý, – dedi Ulytaý oblysynyń ákimi Eset Baıken.
6 myń kórermenge arnalǵan jabyq fýtbol stadıonynyń qurylysyn 2027–2028 jyldary júzege asyrý josparlanyp otyr. Jańa nysan jergilikti fýtbol komandalary men sport mektepterine jyl boıy jattyǵý ótkizýge, sondaı-aq túrli jarystar men oıyndardy uıymdastyrýǵa múmkindik beredi.
Al zamanaýı tennıs ortalyǵynyń qurylysy 2026–2028 jyldarǵa josparlanǵan. Joba aıasynda jabyq jáne ashyq tennıs korttaryn, ákimshilik-turmystyq keshendi, jattyǵý zaldaryn, sondaı-aq sportshylarǵa medıtsınalyq kómek kórsetý jáne jattyǵýdan keıin qalpyna kelýine arnalǵan bólmelerdi salý kózdelgen.
Sonymen qatar, «Qazaqmys» korporatsııasynyń qoldaýymen 2026–2027 jyldary Jezqazǵan qalasynda meshit pen Kongress-ortalyq salý, qoǵamdyq keńistikterdi abattandyrý, mádenıet nysandaryn jóndeý, Keńgir sý qoımasynyń jaǵalaýyn abattandyrý jáne basqa da birqatar jobalardy iske asyrý josparlanyp otyr.
Atalǵan bastamalardy júzege asyrý Jezqazǵanda sportpen shuǵyldanýǵa jáne belsendi demalysqa jańa múmkindikter ashyp, áleýmettik jáne qalalyq ınfraqurylymnyń damýyna qosymsha serpin bermek.
