Jezqazǵanda 50 jyl ishinde alǵash ret jańa zamanaýı órt sóndirý bólimi ashyldy
JEZQAZǴAN. KAZINFORM – Jezqazǵanda jańa órt sóndirý bólimi paıdalanýǵa berildi. Tótenshe jaǵdaılar mınıstrligi málimetinshe, bul – qalada sońǵy jarty ǵasyrda salynǵan osyndaı úlgidegi alǵashqy nysan.
Saltanatty ashylý rásimin Tótenshe jaǵdaılar mınıstri general-leıtenant Shyńǵys Árinov ótkizip, qutqarýshylarǵa jańa tehnıka men qyzmettik páterlerdiń kiltin tabys etti.
Mınıstrdiń aıtýynsha, nysandy iske qosý bólimshelerdiń órt pen tótenshe jaǵdaılarǵa jedel den qoıýǵa daıyndyǵyn aıtarlyqtaı arttyrady. Órt sóndirý bólimi tórt shyǵýǵa arnalǵan jáne qazirgi zamanǵy talaptarǵa tolyq sáıkes keledi.
Ǵımaratta tehnıkaǵa arnalǵan bokstar, kezekshi jáne oqý bólmeleri, Apattar medıtsınasy ortalyǵynyń dárigerlerine arnalǵan kabınetter, demalys bólmeleri men dıspetcherlik bólme ornalasqan. Jeke quramǵa ótimdiligi joǵary órt sóndirý avtotsısternalary, sý aıdyndarynda jumys isteýge arnalǵan avarııalyq-qutqarý mashınalary men motorly qaıyqtar berildi.
Qutqarýshylarǵa bólim aýmaǵynda salynǵan qyzmettik páterlerdiń kilti tabys etildi. Eki qabatty qyzmettik úı barlyq qajetti jáne jaıly jaǵdaılardy qamtamasyz etedi. Sondaı-aq, bólim aýmaǵynda qazirgi zamanǵy sport alańy jabdyqtalǵan, ol qutqarýshylardyń dene shynyqtyrý daıyndyǵyn qamtamasyz etip qana qoımaı, balalardyń yńǵaıly ári qaýipsiz demalýy men oınaýyna jaǵdaı jasaıdy.
Jańa órt sóndirý bóliminiń ashylýy Ulytaý oblysynyń órtke qarsy ınfraqurylymyn nyǵaıtýda jáne halyqty qorǵaý deńgeıin arttyrýda mańyzdy qadam boldy.
Aıta keteıik, Ulytaý oblysynda Qazaqstan TJM birinshi avıatsııalyq jasaǵy paıdalanýǵa berildi.