Jezqazǵanda 400 oryndyq Oqýshylar saraıy salynady
JEZQAZǴAN. KAZINFORM — Búgin Ulytaý oblysynyń ákimi Dastan Ryspekov Jezqazǵan qalasynyń halqymen kezdesti, dep habarlaıdy oblys ákimdiginiń baspasóz qyzmeti.
Jyl basynan beri bilim berý salasynda daryndy balalarǵa arnalǵan «Ulytaý daryny» jáne aýtızmge shaldyqqan balalarǵa qoldaý kórsetý ortalyqtary ashyldy. Sondaı-aq, Jezqazǵanda Abaı atyndaǵy mamandandyrylǵan mektep-ınternatta 200 oryndyq jataqhana salyndy.
28 bilim berý nysany (23 mektep, 4 balabaqsha, bilim bóliminiń 1 ǵımaraty) jóndeldi, onyń ishinde Jezqazǵanda 1 nysan (№ 3 mektep), budan bólek, 2 mektepke arnalǵan sport alańdary salyndy (№ 8, 22 mektepter). Oqýshylarǵa yńǵaıly bolý jáne olardyń qaýipsizdigin qamtamasyz etý úshin 10 shaǵyn avtobýs satyp alyndy, onyń 2-eýi Jezqazǵan qalasy úshin.
— Jezqazǵanda 300 oryndyq 1 jaıly mekteptiń qurylysy aıaqtalýda. Jyl sońyna deıin oblys boıynsha 3 balabaqsha ashylady, onyń ishinde Jezqazǵanda turǵyndarymyz kópten kútken 320 oryndyq 1 balabaqshanyń qurylysy aıaqtalady. Keler jyly oblysta 2,7 mlrd teńgege 160 oqýshyǵa arnalǵan 2 mekteptiń (Qarajal, Jańaarqa) jáne oblys ortalyǵynda 400 oryndyq Oqýshylar saraıynyń qurylysy bastalady, — dedi óńir basshysy.
Sonymen qatar, bıylǵy jyly qazan aıynda Ulytaý oblysynyń «Úzdik pedagogi» konkýrsy ótkizildi.
— Atalǵan konkýrsqa 13-ten astam úmitker qatysty, 6 ustaz «Úzdik pedagogi» ataǵyna ıe boldy. Onyń ishinde Jezqazǵan qalasynyń ustazdaryn atap ótkim keledi: Djandıldınov Medet Qurmanǵazyuly — Abaı atyndaǵy mekteptiń aǵylshyn tili páni muǵalimi, Nazarymbetova Gúlbaǵıla Tóleýqyzy — № 1 mekteptiń ınformatıka páni muǵalimi, Kachýr Olga Grıgorevna — № 22 mekteptiń bıologııa páni muǵalimi. Ustazdarymyzdy shyn júrekten quttyqtaımyn! , — dedi Dastan Ryspekov.
Buǵan deıin qaıtarylǵan aktıvter esebinen 1,2 mlrd teńgege Ulytaý oblysynda jańa mektep salynatyny habarlandy.