Jezqazǵanda 3 jasar balany urǵan tárbıeshige qatysty sot úkimi shyqty

ASTANA. KAZINFORM — Jezqazǵan qalasynda balabaqsha tárbıeshisi úsh jasar balany uryp jibergen, dep habarlaıdy Ulytaý oblysy prokýratýrasynyń baspasóz qyzmeti.

Pedagogqa qatysty qylmystyq is qozǵalǵan. Sotta tárbıeshi jasalǵan quqyq buzýshylyq boıynsha kinásin moıyndamady, biraq onyń kinási is boıynsha usynylǵan dáleldemelermen, atap aıtqanda balabaqshadaǵy beınebaqylaý kameralarynyń beınejazbasymen rastaldy.

— Tárbıeshige 3 jyl merzimge pedagogıkalyq jáne kámeletke tolmaǵandarmen jumys isteýge baılanysty laýazymdardy atqarý quqyǵynan aıyra otyryp, 80 saǵatqa qoǵamdyq jumystarǵa tartý jazasy qoldanyldy. Sot úkimi kúshine endi, — delingen vedomstvo taratqan aqparatta.

Osyǵan deıin Astanada eki jasar búldirshin baqshada býllıngke ushyraǵanyn jazǵan edik.