Jezqazǵanda 1 000 oryndyq BINOM mektebi salynady
JEZQAZǴAN. KAZINFORM — Ulytaý oblysynda bilim berý ınfraqurylymyn damytý aıasynda birqatar jańa mektepter men balabaqshalar salý josparlanyp otyr. Bul týraly tamyz pedagogıkalyq konferentsııasynda Ulytaý oblysynyń ákimi Eset Baıken aıtty.
Óńir basshysynyń aıtýynsha, bıyl Jezqazǵan qalasynyń Batys aýdanynda 1 000 oryndyq BINOM mektebiniń qurylysy bastalady. Sonymen qatar Jańaarqa aýdanynda 600 oryndyq, Túgisken aýylynda 300 oryndyq, Jezqazǵan qalasynda 900 oryndyq jáne Sátbaev qalasynda 600 oryndyq mektep salý josparlanǵan.
Budan bólek uldarǵa jáne qyzdarǵa arnalǵan «Bilim-ınnovatsııa» mamandandyrylǵan lıtseıleri ınternat-jataqhanalarymen birge salynady.
Óńirde Nazarbaev Zııatkerlik mektebin ashý da josparlanyp otyr.
Mektepke deıingi bilim berý ınfraqurylymy da keńeıtiledi. Jezqazǵan qalasynyń Keńgir aýylynda 320 oryndyq, Sátbaev qalasynda 280 oryndyq jańa balabaqshalardyń qurylysy bastalady.
Sondaı-aq jańa oqý jylynda Qarajal qalasynda jáne Jańaarqa aýdanynyń Manadyr stantsııasynda jańa mektepter paıdalanýǵa beriledi.
Jańa bilim berý nysandary oqýshy oryndarynyń tapshylyǵyn azaıtyp, balalardyń sapaly bilim alýyna zamanaýı jaǵdaı jasaýǵa múmkindik beredi.
