Jezqazǵan jylýsyz qalýy múmkin – Senator Úkimet basshysyna júgindi

ASTANA. QazAqparat – Senattyń jalpy otyrysynda depýtat Serik Shaıdarov Jezqazǵan qalasy ınfraqurylymynyń máselesin kóterdi. Ol Premer-Mınıstr Álıhan Smaıylovqa joldaǵan depýtattyq saýalynda apatty úıler, tozyǵy jetken ınjenerlik jáne jol ınfraqurylymy, ekologııa men sapaly aýyz sý problemasy jaıynda aıtty, dep habarlaıdy QazAqparat tilshisi.

Ulytaý oblysy jylýsyz, sýsyz qalýy múmkin: Senator Úkimet basshysyna júgindi

S. Shaıdarov Memleket basshysy Qasym-Jomart Toqaevtyń «Ádiletti Qazaqstannyń ekonomıkalyq baǵdary» atty Joldaýynda ómirlik mańyzdy ınfraqurylymdyq jobalardy iske asyrýǵa erekshe nazar aýdarǵanyn atap ótti.

«Máselen, Jezqazǵan qalasyn sýmen jabdyqtaıtyn Esqula sý qubyrynyń qurylysyna toqtalsaq, 2021 jyly nysan aıaqtalýy kerek edi. Biraq 530 mıllıon teńge somasyndaǵy qarajat ıgerilmegennen nysan tapsyrylmaı qaldy. Jobany aıaqtaýǵa bıyl 427 mln teńge qarastyrylǵan. Siz (Úkimet basshysy Álıhan Smaıylov) Ulytaý oblysyna saparmen barǵan kezde, osy jyldyń maýsym aıynda kestege sáıkes nysandy tapsyrý týraly tapsyrma berdińiz. Alaıda qazirge nysan paıdalanýǵa berilmegen, jaýapty mınıstrlik jaǵynan baqylaý bolmady. Jalpy, nysan bıyl berilmeıdi degen kúdik bar», - dedi depýtat.

Sonymen qatar S. Shaıdarov Jezqazǵan qalasynyń basqa da mańyzdy obektileri, onyń arasynda sý qubyry, sharýashylyq aýyz sý tazartý nysandary men jylý jelileri boıynsha problemalardy aıtty.

«Jezqazǵan qalasyndaǵy JEO-nyń jylytý maýsymyna daıyndyǵy máselesine de toqtalǵym keledi. Óńirge barǵan kezde, biz osy nysandy aralap, jóndeý jumystarynyń oryndalý barysymen tanystyq. Ondaǵy negizgi energetıkalyq jabdyqtardyń tozyǵy jetken. Stantsııadaǵy qazandyq agregattarynyń ortasha tozýy 74 paıyzdy, týrbınalardyń tozýy 63 paıyzdy qurady. № 8, 10-shy qazandyqtardy jańartý is júzinde júrgizilmegen. Negizgi jabdyqtar boıynsha kúrdeli jóndeý bekitilgen merzimde atqarylmaǵanyn eskersek, aldaǵy jylý berý maýsymy bastalatyn kezde bul jabdyqtardyń daıyn bolmaýy qaýpi bar», - dedi senator.