Jezqazǵan Jylý elektr ortalyǵyndaǵy jóndeý jumystaryn tolyq kólemde qarjylandyrý qajet – Álıhan Smaıylov

ASTANA. QazAqparat - Ulytaý oblysyna jumys sapary aıasynda QR Premer-Mınıstri Álıhan Smaıylov birinshi kezekte Memleket basshysynyń óńirdiń kólik-logıstıkalyq áleýetin damytý jónindegi tapsyrmasyn oryndaý aıasynda rekonstrýktsııalanatyn respýblıkalyq mańyzy bar «Qyzylorda – Jezqazǵan» avtomobıl jolynyń ýchaskesine bardy, dep habarlaıdy QR Úkimetiniń baspasóz qyzmeti.

Uzyndyǵy 208 shaqyrymdy quraıtyn jol ýchaskesinde 2023-2025 jyldar aralyǵynda kúrdeli jóndeý jumystary júrgiziletin bolady. Ol «Qyzylorda – Pavlodar – Ýspenka – RF shekarasy» tas jolyn rekonstrýktsııalaý jobasy aıasynda iske asyrylatyn uzyndyǵy 305 km «Jezqazǵan – Qaraǵandy» kúre jolymen qatar jańǵyrtylatyn ýchaskelerdiń biri bolady.
Premer-Mınıstr bıyl respýblıkalyq mańyzy bar joldardy damytýǵa 420 mlrd teńge qarastyrylǵanyn, sonyń esebinen 3,6 myń shaqyrym jolda qurylys jáne jańǵyrtý jumystary jalǵasatynyn atap ótti.

«Qyzylorda – Jezqazǵan» avtojolyn rekonstrýktsııalaýǵa meılinshe jergilikti kompanııalardy tartý qajet. Bıyl bastapqy kezeńinde 65 shaqyrym jol paıdalanýǵa berilýge tıis. Jalpy jobany aıaqtaý óńirdiń áleýmettik-ekonomıkalyq damýyna tyń serpin beredi», — dedi Álıhan Smaıylov.

Sonymen qatar Úkimet basshysy Jezqazǵan JEO jumysyn tekserip, onyń aldaǵy jylytý maýsymyna daıyndyq sharalarymen tanysty. Búgingi tańda jylý ortalyǵy shamamen 244 MVt elektr qýatyn jáne 496 Gkal/saǵ jylý qýatyn óndiredi. Stantsııanyń negizgi jabdyqtary – 8 qazandyq agregaty, olardyń ekeýi buǵan deıin kúrdeli jóndeýden ótken jáne 5 týrbınaly generator.

Premer-Mınıstr JEO qazandyq agregattarynyń ortasha tozý deńgeıi 74% ekenin atap ótti, osyǵan baılanysty menshik ıesi jańa jylytý maýsymyna deıin qosymsha qazandyqty iske qosý boıynsha jumys júrgizip, jalpy energııa kózin kúrdeli jóndeý máselelerimen belsendi túrde aınalysýy qajet.

«Aldaǵy qysta tosyn jaǵdaılardyń aldyn alý úshin qazirden bastap JEO-ny jóndeýge qarjy quıý kerek. Ótken jyly menshik ıesi 2,3 mlrd teńge salýdy josparlaǵan bolatyn, biraq jumystyń bir bóligi keıinge qaldyryldy. Bıyl JEO-daǵy jóndeý jumystaryn tolyqtaı qarjylandyrý qajet. Qarajat «Tarıfti ınvestıtsııaǵa aıyrbastaý» baǵdarlamasy aıasynda qaıtarylatyn bolady», — dedi Álıhan Smaıylov.

Odan keıin Úkimet basshysy Jezqazǵan qalasyndaǵy «Jylý jáne sýmen jabdyqtaý kásiporny» AQ-qa baryp, negizgi sharýashylyq-aýyz sý tazartý qurylysyn rekonstrýktsııalaý barysymen tanysty (2-kezek). Osy jumys aıasynda sharýashylyq-aýyz sýdy tazartý men daıyndaýdyń jańa tehnologııalaryn qoldaný kózdelgen. 2022 jylǵy mamyr aıynda bastalǵan qurylys jumystary 2025 jylǵy jeltoqsan aıynda aıaqtalýy tıis.
Álıhan Smaıylovtyń aıtýynsha, Memleket basshysynyń tapsyrmasy boıynsha óńirdegi aýyl turǵyndaryn aýyz sýmen qamtamasyz etý úshin 2025 jylǵa deıin 30 eldi mekende keshendi sý blogy modýlderi men 4 eldi mekende sý qubyry jelilerin salý kózdelgen.
«Qýatty óńirler – el damýynyń draıveri» ulttyq jobasy aıasynda bıyl sharýashylyq-aýyz sý tazartý qurylystaryn jańǵyrtý jumystary bastalmaq. Osy maqsatqa respýblıkalyq bıýdjetten 6 mlrd teńge bólindi. Osyǵan baılanysty ákimdik josparlanǵan jumystardyń sapaly júrgizilýin qamtamasyz etýi qajet», — dedi Úkimet basshysy.

Jumys sapary aıasynda Premer-Mınıstrge óńirdi damytýdyń bas jospary men Jezqazǵandy egjeı-tegjeıli josparlaý jobasy tanystyryldy. Aldaǵy eki jylda qalada jańa kóp páterli turǵyn úıler, mádenıet, bilim berý, sport, densaýlyq saqtaý nysandaryn jáne ákimshilik ǵımarattardy salý josparlanyp otyr. Budan basqa Keńgir sý qoımasynyń jaǵalaýyn abattandyrý, fýnktsıonaldyq qoǵamdyq oryndar, saıabaqtar men demalys aımaqtaryn qurý jumystary josparlanǵan.
Úkimet basshysynyń aıtýynsha, jańa nysandardy salý úshin ınjenerlik-kólik kommýnıkatsııalaryn damytý mańyzdy bolyp tabylady.,«Infraqurylym júrgizý, ony jańǵyrtý jónindegi jobalardy iske asyrý jáne basqa da is-sharalardy oryndaý kezinde qala shekarasyn odan ári keńeıtý perspektıvalary eskerilýi kerek. Ákimdik bul máseleni baqylaýda ustaýǵa tıis», — dedi Álıhan Smaıylov.