Jezqazǵan jylý jelilerin jańǵyrtýǵa 2,8 mlrd teńgeden asa qarjy bólindi
ASTANA. KAZINFORM — Úkimet Jezqazǵan qalasynyń jylý jelilerin rekonstrýktsııalaý men jańǵyrtýǵa 2,8 mlrd teńgeden astam qarjy qarastyrdy, dep habarlaıdy vedomstvonyń baspasóz qyzmeti.
Úkimet Ulytaý oblysy Jezqazǵan qalasynyń jylý jelilerin rekonstrýktsııalaý jáne jańǵyrtý jobasynyń úshinshi iske qosý kesheniniń ekinshi kezegin júzege asyrý úshin rezervten 2,8 mlrd teńgeden astam qarjy bóldi. Premer-mınıstr Oljas Bektenov tıisti qaýlyǵa qol qoıdy.
Jezqazǵan qalasy jylý jelileriniń uzyndyǵy 398 shaqyrymdy quraıdy. Nysan 1951 jyly paıdalanýǵa berilgen, tozýy — 56,6%. Jylý jelileri tsehynda 1969 jyly iske qosylǵan 8 sorǵy stansasy bar.
— Jylytý maýsymynda jylý jelileriniń tozýy jylýmen qamtýǵa keri áserin tıgizip jatyr. Resýrstardyń aıtarlyqtaı shyǵyny orta eseppen 35-40%-ǵa jetedi, bul qoldanystaǵy jáne salynyp jatqan nysandardy jylý jelilerine qosýǵa múmkindik bermeıdi, — delingen habarlamada.
Qalanyń keńeıýin jáne salynyp jatqan jańa Batys aýdanyn jylýmen qamtamasyz etý qajettiligin eskere otyryp, bastapqy joba túzetildi: qubyrlardyń dıametri 800 mm-den 1000 mm-ge deıin, al rekonstrýktsııalaýǵa jatatyn jelilerdiń uzyndyǵy 11,4 shaqyrymnan 12,3 shaqyrymǵa deıin ulǵaıtyldy. Úkimet rezervinen bólingen 2,8 mlrd teńge jobany aıaqtaýǵa jáne 98 myńnan astam turǵyny bar qalanyń jylý jelilerin sapaly daıyndaýǵa múmkindik beredi.
Buǵan deıin Jezqazǵanda álemdik deńgeıdegi ınjenerlik ýnıversıtet ashylatyny aıtyldy.