Jezqazǵan turǵyny SQO polıtsııasy arhıvinen atylǵan atasy týraly qujattardy tapty
PETROPAVL. QazAqparat - Soltústik Qazaqstan oblystyq polıtsııa arhıvinde Jezqazǵan qalasynyń turǵyny Sholpan Isataeva qýǵyn-súrginge ushyraǵan atasy jaıyndaǵy qujattardy, atasynyń jazbalaryn tapty, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, vedomstvonyń Arnaıy memlekettik arhıvinde kez kelgen adam otbasy tarıhyn qalpyna keltire alady. Jezqazǵan qalasynyń turǵyny Sholpan Isataevanyń atasy 1938 jyly «halyq jaýy» atanyp, keıin atylǵan eken. Soltústikqazaqstandyq Ǵabbas Isataev taǵdyrynyń anyq-qanyǵyna jetpekshi bolǵan nemeresi 9 jyl boıy arhıvterdi qoparǵan.
Sholpan Isataevanyń ákesi Ábish Ǵabbasuly 17 jasynda maıdanǵa attanyp bara jatyp soǵystan oralmaıtynyn aıtqan, sebebi oǵan «halyq jaýynyń balasy» ataǵymen ómir súrý qıyn bolǵan. Úsh ret aýyr jaraqat alsa da, ólim aýzynan aman qaldy.
Nemeresiniń aıtýynsha, ákesine taǵylǵan ádiletsiz aıyptyń kesirinen Ábishtiń urystaǵy erligi, jumystaǵy jetistikteri tıisti baǵalanbady.
Sholpan Ábishqyzy atasynyń adal esimin qaıtarmaqshy. Jezqazǵan qalasynda atasynyń taǵdyry týraly eshqandaı málimet taba almaǵandyqtan, SQO polıtsııasyna júginip, qajetti aqparatqa qol jetkizdi.
Sholpan Ábishqyzy alǵash ret atasynyń jazýyn kórdi. 1938 jyly 3-aqpanda qozǵalyp, toǵyz kúnnen keıin jabylǵan qylmystyq is materıalynda Ǵabbas Isataev jazǵan birneshe bet bar. Aýyl muǵalimi, partııanyń múshesi bolǵan onyń taǵdyryna shyqqan tegi keri áser etti, ol - baılardyń urpaǵy edi.
«Atamdy úsh adammen birge atypty, - dedi Sholpan Isataeva. - Endigi armanym - atylǵan jerin taýyp, duǵa oqý. Sonda janym tynyshtalady....».
«Anyqtamalardyń jáne qujattardyń kóshirmelerin berý - arhıv kórsetetin qyzmetterge jatady, - deıdi SQO PD Aqparattyq-analıtıkalyq ortalyq bastyǵy Samal Qusaıynova.
«Tek týystyqty rastaıtyn qujattardy usyný qajet. Sondaı-aq, «Azamattarǵa arnalǵan úkimet» memlekettik korporatsııasy, ıaǵnı Halyqqa qyzmet kórsetý ortalyǵy arqyly elektrondy túrde júginý múmkindigi de qarastyrylǵan».
