Jezqazǵan temirjol vokzalynda er adam esirtkimen ustaldy

ASTANA. QazAqparat - Jezqazǵan temirjol vokzalynyń janynda avtobýsta otyrǵan er adam esirtkimen ustaldy, dep habarlaıdy QR Ulttyq ulanynyń baspasóz qyzmeti.

Jezqazǵanda Ulttyq ulannyń áskerı qyzmetshisi esirtki zattary bar adamdy tabýǵa jáne ustaýǵa kómektesti.

15 qazan kúni tańerteń 6505 áskerı bóliminiń kınologi efreıtor Almat Ahmetjanov «Aı» atty qyzmettik ıtimen jáne Jezqazǵan qalasynyń polıtsııa qyzmetkerlerimen birge temirjol vokzalynyń janynda avtobýsty tekserý kezinde kúdikti azamatty ustady.

Qyzmettik ıt jolaýshynyń jol sómkesine qarap úrý arqyly ishinde tyıym salynǵan zat baryn bildiredi. Kýágerlerdiń qatysýymen sómke ishinen jaǵymsyz ıisi bar sur-jasyl tústi ósimdik zaty bar polıetılen paketi tárkilendi.

Mán-jaıdy odan ári anyqtaý úshin kúdikti Jezqazǵan qalasynyń Polıtsııa basqarmasyna jetkizildi.