Jezqazǵan polıgonynda oqý-jattyǵý kezinde ofıtserge oq tıdi
ASTANA. KAZINFORM — Jezqazǵan qalasyndaǵy 6505 áskerı bóliminiń oqý polıgonynda jaýyngerlik oqý-jattyǵý kezinde bir áskerı qyzmetshi jeńil jaraqat aldy.
Oqıǵa 12 qyrkúıekte jaýyngerlik daıyndyq kezinde bolǵan. Oqý-jattyǵý alańynda Ulttyq ulan áskerı bóliminiń jaýyngerleri atys jattyǵýyn ótkizgen.
«Qaýipsizdik sharalaryn buzý saldarynan ofıtser aıaǵynan jeńil janama jaraqat alǵan. Oǵan sol jerde barlyq qajetti medıtsınalyq kómek kórsetildi. Onyń jaǵdaıy birqalypty dep baǵalandy, ómirlik mańyzdy aǵzalary zaqymdanbaǵan», — dep habarlady Ulttyq ulannyń «Ortalyq» óńirlik qolbasshylyǵynyń baspasóz qyzmeti.
Qazirgi ýaqytta oqıǵanyń sebepteri men mán-jaıy anyqtalyp, qyzmettik tergeý júrip jatyr.
Eske sala keteıik, munyń aldynda Aqtaýda áskerı qyzmetshi abaısyzda tıgen oqtan kóz jumǵan edi.
Sondaı-aq Jetisý oblysynyń Saryózek garnızonynda da qyzmetkerge oq tıip, jaraqat aldy.
