Jezqazǵan mys qorytý zaýytynda órt shyqty
NUR-SULTAN. QazAqparat – Jezqazǵan mys qorytý zaýytynda órt shyqty. Bul týraly QR Tótenshe jaǵdaılar mınıstrliginiń resmı ókili Talǵat Ýálı málim etti, dep habarlaıdy QazAqparat tilshisi.
«27 mamyr kúni saǵat 08-53-te «Qazaqmys» korporatsııasy» JShS-nyń Jezqazǵan mys qorytý zaýytynda órt shyqqany týraly habarlama kelip tústi. Mys qorytý tsehyndaǵy transformatordyń órtenetin bóligi, shamamen 100 sharshy metr aýmaqqa tógilgen maı janǵan. Zardap shekkender men qaza tapqandar joq. Mys qorytý tsehyndaǵy óndiristik protsess ýaqytsha toqtatyldy», - dedi Talǵat Ýálı.
Resmı ókildiń atap ótýinshe, órtti sóndirýge Qaraǵandy oblystyq tótenshe jaǵdaılar departamenti jeke quramynyń 26 mamany men 7 tehnıkasy, sonymen qatar «Seriktes» JShS-niń órt sóndirý qyzmetiniń 13 mamany men 3 tehnıkasy jumyldyrylǵan.
