Jezqazǵan men Semeıden 500 bala robototehnıka negizderin úırenedi
Nursultan Nazarbaev Qory qazaqstandyq jetekshi «Robotek» robototehnıka mektebimen birlesip Ozyq Urpaq atty jańa jobany iske qosady. Bul - mektep oqýshylaryn robot jasaýǵa, baǵdarlamalaýǵa qyzyǵýshylyǵyn arttyratyn, daryndy balalardy anyqtaıtyn, ozyq bilim berip, oqytýshylar quramynyń biliktiligin arttyrýǵa baǵyttalǵan baǵdarlama.
Joba Jezqazǵan men Semeı qalasynan bastaldy. №21, 49 orta mektepterde muǵalimder men jergilikti bilim bólimderiniń qyzmetkerleri úshin baǵdarlamanyń tusaýkeseri boldy.
Shara barysynda uıymdastyrýshylar Ozyq Urpaq baǵdarlamasynyń baǵyty týraly aıtty.
«Bizdiń mektep 2014 jyly ashylǵan. Jyl saıyn 700 oqýshyny oqytady. Osy ýaqyt ishinde elimizdiń jetekshi mektebiniń birine aınaldy, robototehnıka boıynsha túrli týrnırlerdiń 54 júldegeri men qatysýshysyn daıyndap shyǵardy. Birneshe ret robototehnıka boıynsha respýblıkalyq jarystyń júldegeri atandyq, World Robot Olympiad, FLL Challenge úsh álemdik fınalyna qatystyq. Ozyq Urpaq jobasyn iske asyrý arqyly oqytýshylardyń biliktiligin arttyrý, balalarǵa jańa bilim berý, oqýshylardyń IT salaǵa degen qyzyǵýshylyǵyn oıatý syndy birneshe mindetke qol jetkizýge tyrysamyz», - deıdi Jezqazǵan qalasy №21 orta mekteptegi tusaýkeser kezinde «Robotek» mektebiniń oqytýshysy Sultanbek Qazıev.
Onyń aıtýynsha, «Robotek» mektebiniń tájirıbeli qyzmetkerleri mektep muǵalimderin oqytady, sodan keıin pedagogtar 2022 jyldyń qarashasynan 2023 jyldyń sáýirine deıin oqýshylarǵa fakýltatıvtik sabaqtar ótkizedi. Bul úshin pedagogtar Nursultan Nazarbaev qorynan jalaqy alady.
«Biz bul jobany qoldadyq, óıtkeni ol muǵalimder men balalarǵa ártúrli bilim alýǵa múmkindik beredi. Tehnologııa tez damyp keledi, jańa bilimdi ýaqytynda ıgerý mańyzdy», - deıdi Jezqazǵan qalasyndaǵy №21 orta mekteptiń dırektory Shynar Tasmurzaeva.
Uıymdastyrýshylardyń aıtýynsha, Ozyq Urpaq jobasynyń aýqymy keńeıip, Qazaqstannyń ózge de eldi mekenderin qamtıdy.
