Jezqazǵan men Sátbaev turǵyndarynyń baspanalaryn keri qaıtaryp alýǵa qatysty túsinikteme berildi
NUR-SULTAN. QazAqparat - Qaraǵandy oblysynyń ákimi Jeńis Qasymbek Jezqazǵan men Sátbaev qalalarynda memlekettik baǵdarlama aıasynda berilgen páterlerdi keri qaıtaryp alýda degen áńgimege qatysty málimet berdi, dep habarlaıdy QazAqparat tilshisi.
«Sońǵy 2 apta ishinde Jezqazǵan men Sátbaev qalasynda baspanalardan turǵyndardy shyǵarýda degen ártúrli áńgimeler aıtylyp jatyr. Bul árekettiń jańa ákimge qatysy joq. Jezqazǵandaǵy atalǵan turǵyn úı 2018 jyly memlekettik baǵdarlama aıasynda salynǵan. Ondaǵy páterler ártúrli sanatqa jatatyn turǵyn úı kezeginde turǵan azamattarǵa berilgen. Qazirgi ýaqytta ol jerde qatelik ketkeni anyqtaldy. Ony bári moıyndap otyr. ıAǵnı ol turǵyn úı bıýdjet qyzmetkerlerine arnalmaǵan, olarǵa ol baspana berilmeýi tıis», - dedi J. Qasymbek OKQ-de onlaın túrde ótken baspasóz máslıhatynda.
Óńir basshysynyń sózine sensek, qatelikke qaramastan eshkim berilgen baspanadan shyǵarylmaıdy.
«Aldymyz qys, biz qazir eshkimdi baspanadan shyǵarmaımyz. Qazirgi tańda túrli memlekettik baǵdarlamalar aıasynda atalǵan qalalarda turǵyn úıler salynyp jatyr. Sol baspanalar aldaǵy jeltoqsan aıynda jáne kelesi jyldyń kóktemi men jazynda turǵyndarǵa beriletin bolady. ıAǵnı bul turǵyndar jańa úıge kóshiriledi. Eshkim de dalada qalmaıdy», - dedi ol.
Sondaı-aq, J. Qasymbek baspanany úlestirýde qatelik jibergen mamandardyń jaýapqa tartylatynyn aıtty.
«Turǵyn úılerdi durys úlestirmeý jaǵdaıy 2 qalada oryn aldy. Biri Sátbaev qalasynda, onda barlyǵy 13 otbasy. Ekinshi Jezqazǵan qalasynda 9 otbasy. Osy oraıda atalǵan iske qatysty jáne jaýapty sheneýnikterge sógis jarııalanady», - dedi oblys ákimi.
Aıta ketsek, búgin elordadaǵy Ortalyq kommýnıkatsııalar qyzmetinde Qaraǵandy oblysynyń ákimi Jeńis Qasymbektiń qatysýymen onlaın túrde ótken baspasóz máslıhatynda tilshi Jezqazǵan jáne Sátbaev qalalarynda turǵyndardan memlekettik baǵdarlama aıasynda berilgen baspanalardy keri qaıtaryp alýda. Endi turǵyndar ne isteıdi degen suraq qoıǵan bolatyn.
