Jezqazǵan men Sátbaev turǵyndary sapaly aýyz sýmen qamtamasyz etiledi

QARAǴANDY. QazAqparat – Jezqazǵan men Sátbaev qalalarynda turǵyndardy sapaly sýmen qamtamasyz etý jáne ony úzdiksiz taratý jumystary bastaldy. Bul týraly oblys ákimi Jeńis Qasymbektiń Sátbaev qalasyna jumys sapary barysynda málim boldy, dep habarlaıdy QazAqparat tilshisi.

Bılik ókilderi kópten kútken Esqula sý taratqyshynyń qurylysy jobasyn iske asyrýǵa kirispek. Olar jumysty bir aı aralyǵynda bastaımyz dep ýáde berdi.

«Bıylǵy jyly sizder osy jobany aıaqtaýlaryńyz kerek. Bul óte mańyzdy másele. Qarjylandyrý tolyq kólemde bar. Sondyqtan da sozyp almaı, tezdetińizder», - dedi Jeńis Qasymbek respýblıkalyq «Qaz sý sharýashylyǵy» uıymynyń bas dırektory Altaı Eljasovqa.

Esterińizge sala keteıik, Esqula sý taratqyshy Jezqazǵan men Sátbaev turǵyndaryn sapaly aýyz sýmen qamtamasyz etýi tıis. Alaıda, qarajattyń jetispeýinen jumystar uzaq ýaqytqa sozylyp ketti. Bıylǵy jyly Úkimettiń qoldaýymen jáne «Qazaqmystyń» belsendi qatysýymen qarjy máselesi sheshildi. Joba «Jumyspen qamtýdyń jol kartasy» baǵdarlamasyna engizildi.

«Biz QR-da aýyldyq eldi mekender men monoqalalardy aýyz sýmen qamtamasyz etýmen aınalysamyz. Sátbaev-Jezqazǵan aımaǵy Esqula ken ornynan sý alady. Esqula sý taratqyshyn qaıta qurý jobasy úsh kezeńnen turady. Ony júzege asyrý Sátbaev pen Jezqazǵandy sýmen tolyq qamtamasyz etedi. Bizdiń aldymyzda osy jyly jobanyń barlyq úsh kezeńin aıaqtaý mindeti tur», - dedi Altaı Eljasov.

Sonymen qatar jer asty kózderinen beriletin sýdyń sapasyn jaqsartý úshin «Qojamseıit ken ornyn iske qosýdy eskere otyryp, Úıtas-Aıdos sý taratqyshyn qaıta qalpyna keltirý» jobasynyń JSQ ázirleý jumystary bastaldy. Budan basqa, Jezqazǵan qalasynyń turǵyndaryna úzdiksiz sý berý úshin «Qazaqmys» Keńgir sý qoımasynan jalpy uzyndyǵy 1000 m rezervtik sýaǵar qurylysy boıynsha jumystar júrgizýde.

Sý máselelerin sheshýmen qatar, Jezqazǵan jáne Sátbaev qalalarynda jańa káriz-tazartý qurylystarynyń daıyndyq jumystary bastaldy.

Jumys sapary barysynda oblys basshysy Sátbaev mańyndaǵy kentterden jańa shaǵynaýdanǵa qonys aýdarýshylarǵa arnalǵan úılerdiń qurylysymen tanysty. Sondaı-aq, qurylysy 1990 jyly bastalǵan 60 páterlik úıdi de qarap shyqty. Búgingi kúni onyń qurylysy aıaqtaldy. Bul úıde jıhazy bar 15 páterdi «Qazaqmys» korporatsııasy «kóp balaly otbasylar» sanatyna jatatyn qyzmetkerleri úshin satyp aldy.

Sátbaev qalasynyń ákimdigi turǵyn úı alý kezeginde turǵan kóp balaly otbasylar úshin bul jerde 22 úsh bólmeli páter satyp alýdy josparlap otyr.

Jeńis Qasymbek sondaı-aq 320 oryndyq úsh qabatty balabaqshanyń qurylys alańynda boldy. Onyń qurylysy Jumyspen qamtý jol kartasy aıasynda júrgizilýde. Qazirgi ýaqytta irgetas bloktaryn, jabyn plıtalaryn montajdaý, qabyrǵalardy qalaý boıynsha jumystar júrgizilýde. Qurylysty osy jyldyń sońyna deıin aıaqtaý josparlanyp otyr.

Sátbaev qalasynda JQJK aıasynda TKSh, bilim berý, qurylys, densaýlyq saqtaý salalarynda barlyǵy 18 joba júzege asyrylýda. Úsh balabaqshada, tórt mektepte kúrdeli jóndeý jumystary bastaldy. Aýrýhanany kúrdeli jóndeý josparlanǵan. Joldar qalypqa keltirile bastady. Barlyq jobalar boıynsha 800-ge jýyq adamdy jumys oryndarymen qamtamasyz etý josparlanýda.