«Jezqazǵan» medıtsınalyq ortalyǵy: óńirdiń kardıologııalyq kóshbasshysy jáne Ulytaý densaýlyǵynyń tiregi
ULYTAÝ. KAZINFORM – Jezqazǵanda elimizdegi eń iri jeke medıtsınalyq ortalyqtardyń biri jumys istep tur. Ol óńirdiń densaýlyq saqtaý júıesiniń negizgi tiregine aınaldy. Munda alǵash ret oblys tarıhynda ashyq júrekke operatsııa jasaldy. Búginde ortalyqta «Qazaqmys» korporatsııasynyń qyzmetkerlerimen qatar Jezqazǵan, Sátbaev qalalary men jaqyn aýdandardyń myńdaǵan turǵyny em qabyldaıdy.
«Órkendeý Assıstans» JShS-na qarasty «Jezqazǵan» medıtsınalyq ortalyǵy 1997 jyly paıdalanýǵa berilip, 2002 jyldan bastap tolyqqandy jumys isteı bastady. Qazir bul – Ulytaý oblysyndaǵy eń iri jeke medıtsınalyq mekeme. Munda 1190-nan astam qyzmetker eńbek etedi, onyń ishinde 180-ge jýyq dáriger jáne 600-den astam orta býyn mamandary bar.
2003 jyldan beri atalmysh mekeme bazasynda oblystyq kardıologııalyq ortalyq jumys isteı bastady. Ol densaýlyq saqtaý basqarmasymen áriptestik aıasynda qurylǵan. Munda júrek-qan tamyr aýrýlaryna shaldyqqan naýqastarǵa táýlik boıy kómek kórsetilip, koronarografııa jáne endovaskýlıarlyq otalar jasalady.
— Biz úshin birinshi orynda qan aınalym júıesiniń aýrýlary tur. Sondyqtan dál osy ortalyq bazasynda kardıologııalyq ortalyq ashý týraly memorandýmǵa qol qoıdyq. Búginde munda koronarografııa men basqa da joǵary tehnologııalyq otalar jasalady, — dedi «Jezqazǵan medıtsınalyq ortalyǵynyń» dırektory Dáýren Amanqulov.
Onyń aıtýynsha, bıyl tamyz aıynda óńir tarıhynda alǵash ret júrekke ashyq ota jasaldy.
— 6 tamyzda alǵashqy eki operatsııa jasadyq, al 22 tamyzda taǵy ekeýin ótkizdik. Bul búkil oblys úshin tarıhı oqıǵa boldy, — dep atap ótti ol.
Medortalyqtyń jobalyq qýattylyǵy — 300 tósek orny. Sonyń 116-sy memlekettik tapsyrys boıynsha qarjylandyrylady (ÁMSQ jáne memlekettik dotatsııalar esebinen). Munda táýlik boıy jumys isteıtin 14 statsıonar, 2 kúndizgi statsıonar jáne úsh emhana bar. Kún saıyn 1000-ǵa jýyq adam qabyldanady.
Búginde ortalyqqa Jezqazǵan men Sátbaevtyń 34 myńǵa jýyq turǵyny tirkelgen.
— Paıyzdyq úlespen alǵanda, tirkelgenderdiń 55%-y — qala turǵyndary, al 45%-y — korporatsııa qyzmetkerleri men zeınetkerler. Degenmen statsıonardaǵy naýqastardyń 70%-dan astamy oblys turǵyndary bolsa, 30%-ǵa jýyǵy ǵana kompanııa qyzmetkerleri, — dep naqtylady Dáýren Amanqulov.
Ortalyqtyń quramynda trıaj-júıesi bar qabyldaý bólimi, jeti operatsııalyq, jansaqtaý bólimi, fýnktsıonaldy dıagnostıka (KT, joǵary klassty ÝDZ, 3D-tomograf), fızıoterapııa, zerthana, dárihana jáne jedel járdem qyzmeti bar.
Ońaltý sharalaryna erekshe kóńil bólinedi. Ortalyqta balalarǵa arnalǵan ońaltý bólimi jáne óńirge tán biregeı kardıologııalyq qalpyna keltirý baǵdarlamasy jumys isteıdi.
— Biz doktor Býbnovskıı ortalyǵymen áriptestik ornattyq. Statsıonarymyzdyń bazasynda kınezıterapııa bólimi jumys isteıdi. Munda naýqastar zamanaýı ádistemeler boıynsha ońaltýdan ótedi. Bul olardyń densaýlyǵyn qalpyna keltirýge aıtarlyqtaı kómektesedi, — dedi ortalyq basshysy.
«Jezqazǵan» medortalyǵynyń jalpy aýmaǵy — 26 myń sharshy metr. Onyń quramyna óndiristik medıtsınaǵa arnalǵan 40 densaýlyq pýnkti, 33 bólmeden turatyn qonaqúı, dárigerlerge arnalǵan 36 páterlik turǵyn úı jáne óz qazandyǵy kiredi.
2024 jylǵy qazanda ortalyq Ulttyq akkredıtatsııanyń joǵary sanatyna ıe boldy. Bul osyndaı mártebege ıe bolǵan óńirdegi jalǵyz medıtsınalyq mekeme sanalady.
Aýqymdy resýrstar men 95%-dyq jasaqtalýyna qaramastan, kadr tapshylyǵy bar. Ásirese jalpy tájirıbe dárigerleri jetispeıdi.
— Bizdiń dárigerlerdiń ortasha aılyǵy shamamen 500 myń teńge. Biz jas mamandardy tartý úshin de, kásibı kadrlardy óńirde ustap qalý úshin de bar jaǵdaıdy jasaýǵa tyrysamyz, — dedi Dáýren Amanqulov.
Qazirgi tańda medıtsınalyq ortalyq Qazaqstandaǵy eń iri 10 jeke medıtsınalyq mekemeniń qataryna enedi jáne Ulytaý oblysynyń densaýlyq saqtaý júıesiniń jetekshi býyny. Jergilikti turǵyndar osynda zamanaýı tehnologııalar men joǵary bilikti kómekke qol jetkize alady. Bul ózge qalalarǵa barý qajettiligin aıtarlyqtaı azaıtty.
— Bizdiń maqsatymyz — óńir turǵyndary sapaly medıtsınalyq kómekti dál osy jerde, Jezqazǵanda alýyna jaǵdaı jasaý. Qazirdiń ózinde jasalǵan qadamdarymyz biz durys baǵytta kele jatqanymyzdy kórsetip otyr, — dep túıindedi ortalyq dırektory.
Eske sala keteıik, tamyz aıynda Ulytaý oblysynda alǵash ret júrekke ashyq operatsııa jasaldy.