Jezqazǵan mańynda kún elektr stantsııasy salynýda
QARAǴANDY. QazAqparat - Jańa kún elektr stantsııasy Jezqazǵan mańyndaǵy Keńgir aýylynda salynyp jatyr, dep habarlaıdy QazAqparat tilshisi.
Búginde 29 300 kún panelderiniń 5200-i ornatylǵan. Jumystardy jyl sońyna deıin aıaqtaý josparlanýda, stantsııanyń ashylýy 22 jeltoqsanǵa belgilengen.
Onyń qýattylyǵy 10 Mvt teń. Qurylys jumystaryna 74 adam jumyldyrylǵan. Jumystar aıaqtalǵan soń stantsııada 10 adam turaqty jumyspen qamtylady.
«Bolashaqta kún elektr stantsııalarynyń kóbeıýimen bizder tarıfter baǵasyn tómendete alamyz. Bul óte qymbat tehnologııa, sondyqtan elektr energııasynyń ózi arzan emes. Alaıda kún elektr stantsııalarynyń sany artsa, bul baǵalardyń tómendeýine yqpal etedi», - dep túsindirdi apparattyq jıynda energetıka jáne TKSh basqarmasynyń basshysy Ulantaı Úsenov.
Búginde oblystaǵy Saranda, Aqtoǵaı aýdanynyń Gúlshat aýylynda jáne Shet aýdanynyń Aqadyr aýylynda úsh kún elektr stantsııalary jumys jasaıdy. Olar óndiretin barlyq elektr qýaty tutynýshylarǵa esh áserin tıgizbeýde. Alaıda, zamanaýı kún elektr stantsııalarynyń kóbeıýimen bul jaǵdaı ózgerýi múmkin.
Jańa energııa kózderiniń iske qosylýymen jyl basynan beri oblysta 147,1 mln. kVt/saǵat qýat óndirilgen. Jyl sońyna deıin bul kórsetkish 190 mln. kVt/saǵatty quraıdy.
Kún elektr stantsııalaryn ashý arqyly oblysqa 94 mlrd teńge kóleminde ınvestıtsııa tartylyp, 58 jańa jumys oryndary quryldy.
