Jezqazǵan mańyndaǵy shahtada órt shyqty
ULYTAÝ. KAZINFORM — Ulytaý oblysyndaǵy jumys istemeı turǵan «Ońtústik Jezqazǵan» shahtasynyń aýmaǵynda órt shyqty. Jer betinde bastalǵan órt shahta oqpanynyń jerasty bóligindegi aǵash konstrýktsııalarǵa taraǵan.
22 qyrkúıek saǵat 13:05–te Sátbaev qalasynan 35 shaqyrym jerde ornalasqan «Ońtústik Jezqazǵan» kenishiniń № 45 shahtasy aýmaǵynda koperdiń aǵash konstrýktsııalary tutanǵan. Bul týraly Ulytaý oblysynyń Tótenshe jaǵdaılar departamenti habarlady.
Saǵat 13:58–de jer betindegi ashyq ot oqshaýlanǵan. Alaıda keıin órttiń shahta oqpanynyń jerasty bóligindegi aǵash konstrýktsııalarǵa taraǵany anyqtaldy. Aldyn ala málimet boıynsha, órt aǵash bekitpelerdiń 233 metrlik bóliginde bolǵan.
Shahta 2025 jyldan beri paıdalanylmaıdy.
Oqıǵa ornyna «Seriktes» AQ Jezqazǵan avarııalyq-qutqarý jasaǵynyń taý-ken qutqarýshylary keldi. Olar shahta oqpanyndaǵy janýdy toqtatý jáne otteginiń kelýin shekteý jumystaryn júrgizdi.
Qaýipsizdik maqsatynda № 65 shahtanyń jumysy toqtatyldy. Ondaǵy 152 adamnyń barlyǵy jer betine shyǵaryldy.
Shahtadaǵy jaǵdaıdy baǵalaý úshin avarııalyq-qutqarý jasaǵynyń jáne ınjenerlik-tehnıkalyq quramnyń 25 mamany jumyldyryldy.
Saǵat 19:35–te órt tolyqtaı sóndirildi.
Buǵan deıin Ońtústik Jezqazǵan kenishindegi shahtalardyń biriniń jumysshylary tehnıka jaǵdaıy men eńbek jaǵdaıyna nazar aýdarýdy talap etkeni habarlanǵan bolatyn. Eńbek ujymymen kezdesýden keıin kompanııa óndiristi jańǵyrtýǵa baǵyttalǵan ınvestıtsııalardy jedeldetý qajettigin málimdedi.
