«Jezqazǵan-Qyzylorda» jolynyń qurylysy 2017 jylǵa shegerildi
ASTANA. QazAqparat - «Jezqazǵan-Qyzylorda» jolyn qaıta salý 2017 jylǵa shegerildi. Bul týraly búgin Ortalyq kommýnıkatsııalar qyzmetindegi baspasóz máslıhatynda Investıtsııalar jáne damý mınıstrligi Avtokólik joldary komıteti tóraǵasynyń orynbasary Amangeldi Bekov málim etti.
«Qyzylorda-Qaraǵandy» jolyn qaıta salý boıynsha bıyl Jezqazǵan men Qyzylorda arasyndaǵy ýchaskesindegi jobany iske asyrýdy bastaýǵa qarjy qarastyrylǵan bolatyn. Alaıda 2016 jyly jol bıýdjeti shekteýli bolǵandyqtan, jańa jobalarǵa qarjy baǵyttaý orynsyz boldy», - dedi ol.
Osy oraıda ol bólingen qarjyny bastalǵan «Astana-Temirtaý», «Astana-Pavlodar» jáne «Almaty-Qapshaǵaı» jobalaryn aıaqtaýǵa qaıta baǵyttaý týraly sheshim qabyldanǵanyn atap ótti.
«Qazirgi kezde atalǵan joldyń (Jezqazǵan-Qyzylorda) rekonstrýktsııasyna zaım tartý máselesi qarastyrylýda. Jobany júzege asyrý 2017 jyly bolady dep kútilýde. Bul joldyń uzyndyǵy 925 shaqyrym, al jobadaǵy qurylys jumystarynyń quny shamamen 270 mlrd. teńge bolmaq»,-dedi A. Bekov.
