Jezqazǵan-Qyzylorda avtojoly 3,5 jyldyń ishinde salynyp bitedi

NUR-SULTAN. QazAqparat – Bıyl Qyzylorda men Jezqazǵan qalalaryn jalǵaıtyn uzyndyǵy 420 shaqyrymdyq joldyń qurylysy bastalady. Bul týraly QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Bul - óte ózekti másele. Búkil Qyzylorda oblysynyń, Qazaqstannyń ońtústiginiń turǵyndary osy joldyń ashylýyn kútip júr. Jezqazǵan-Qyzylorda jolynyń uzyndyǵy 420 shaqyrymdy quraıdy. Jobalyq barlyq qujaty daıyn, úılestirý keńesinen óttik. Qarjylandyrý ınstıtýttarymen qarjylandyrý máselesin kelistik. Bıyl osy joldyń qurylysyn bastaýdy josparlap otyrmyz. Shynymen de bul jol Keńes zamanynda, 70-shy jyldary salynǵan. Qyzylorda men Jezqazǵandy jalǵaıtyn bul jol jaramsyz bolyp qaldy desek te artyq emes. 3,5 jyldyń ishinde joldy salyp shyǵýdy kózdep otyrmyz. Sol kezde Qyzylordanyń, Ońtústik Qazaqstannyń turǵyndary osy qysqa jolmen júre alady», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Sonymen qatar ol atalǵan joldyń áleýmettik-ekonomıkalyq mańyzy zor ekendigin basa aıtty.

«Qurylys jumystaryn osy jyly bastap ketemiz. Barlyǵy maquldanǵan», - dedi Beıbit Atamqulov.