Jezqazǵan kenshileri shahtadaǵy qural-jabdyqtyń tozǵanyn aıtyp shaǵymdandy
JEZQAZǴAN. KAZINFORM — Jezqazǵandaǵy kenshiler shahtalardaǵy tehnıka jaǵdaıy men eńbek qaýipsizdigine qatysty jiti máselelerdi kóterdi. Ujymmen kkezdesýden keıin kompanııa óndiristik ınfraqurylymdy jańartý baǵdarlamasyn jedeldetetinin málimdedi.
Jezqazǵandaǵy Ońtústik kenishke qarasty shahtalardyń birinde eńbek etetin jumysshylar óndiristik jabdyqtardyń tozý deńgeıi men eńbek jaǵdaıyna qatysty narazylyqtaryn bildirdi. Osyǵan baılanysty kásiporyn basshylyǵy men ujym ókilderiniń qatysýymen arnaıy kezdesý ótti.
Talqylaý barysynda kenshiler óndiris úderisindegi birqatar túıtkildi atap ótip, materıaldyq-tehnıkalyq qamtamasyz etýdi jaqsartý jóninde naqty usynystaryn jetkizdi. Qoıylǵan barlyq másele belgilengen tártipke sáıkes jan-jaqty qaralatyny aıtyldy.
«Qazaqmys» ókilderi kóterilgen negizgi máselelerdiń basym bóligi óndiristik jabdyqtardyń tehnıkalyq jaı-kúıine qatysty ekenin atap ótti. Kompanııa bul jaǵdaıdyń uzaq jyldar boıy jetkiliksiz qarjylandyrý saldarynan qalyptasqanyn moıyndap, aldaǵy kezeńde ınvestıtsııalyq baǵdarlamany kúsheıtý jáne úderisti jedeldetý josparlanǵanyn habarlady.
— Sońǵy jyldary uzaq ýaqyt boıy qarjylandyrý kóleminiń shekteýli bolýy saldarynan jabdyqtardyń tozý deńgeıine qatysty birqatar másele qordalandy. Osyǵan baılanysty kompanııa basshylyǵy óndiristegi qaýipsizdikti arttyrý, eńbek jaǵdaıyn jaqsartý jáne ınfraqurylymdy jańartý maqsatynda ınvestıtsııalyq baǵdarlamany keńeıtip, ony jedeldetýge sheshim qabyldady, — delingen resmı málimdemede.
Kompanııa sondaı-aq óndiristik protsesterdiń shtattyq rejımde jalǵasyp jatqanyn, barlyq jumys bekitilgen josparǵa sáıkes oryndalyp otyrǵanyn naqtylady.
Aıta keteıik, buǵan deıin Shyǵys Qazaqstan oblysynda taý jynysynyń opyrylýy saldarynan kenshi qaza tapqan bolatyn.
