Jezqazǵan ken baıytý fabrıkasynda tóbe qulap basyp qalǵan jumysshy aýrýhanada qaıtys boldy
ALMATY. QazAqparat - Bir aptadan beri aýrýhanada jatqan Jezqazǵan ken baıytý fabrıkasynyń jumysshysy qaıtys boldy. Dárigerler onyń ómirine arasha bola almady. Bul týraly «Qazaqmys korporatsııasy» JShS baspasóz qyzmeti habarlady.
Jazataıym oqıǵa Jezqazǵan ken baıytý fabrıkalarynyń birinde 3 sáýirde bolǵan.
Fabrıkada gıdrotsıklondarǵa qyzmet kórsetýge arnalǵan ústińgi alań opyrylyp qulaǵan. Sol jerden qaýipsiz orynǵa ketip úlgermegen 28 jastaǵy jumysshy aýyr jaraqat aldy.
Alǵashqy kómek kórsetilgennen keıin ony jedel járdem qyzmeti Jezqazǵan qalasynyń medıtsınalyq ortalyǵyna jetkizdi.
Bir apta boıy onyń ómirin arashalýǵa jantalasqan dárigerler onyń búgin kóz jumǵanyn habarlady.
Jazataıym oqıǵa sebepterin anyqtaý úshin arnaıy komıssııa quryldy.
«Qazaqmys» kompanııasynyń basshylyǵy men eńbek ujymy qaza bolǵan eńbekkerdiń týǵan-týystaryna kóńil aıtady.
