«Jezqazǵan – Qaraǵandy» tasjoly qaıta jańartylyp, joba aıasynda 20 kópir salynady
ASTANA. KAZINFORM - Bul týraly Ulytaý jáne Qaraǵandy oblystaryndaǵy jol jobalaryn iske asyrý máselelerine arnalǵan jumys keńesi barysynda málim boldy, dep habarlaıdy Qazavtojol.
Keńeske Ulytaý oblysynyń ákimi Eset Baıken, Qaraǵandy oblysy ákiminiń orynbasary Azamat Taıjanov, «QazAvtoJol» kompanııasynyń oblystyq fılıaldarynyń basshylary, merdiger uıymdar men múddeli memlekettik organdardyń ókilderi qatysty.
Kezdesý barysynda joldardy salý jáne jóndeý qarqyny, tehnıka men eńbek resýrstaryn jumyldyrý, qurylys nysandaryn qajetti materıaldarmen qamtamasyz etý, sondaı-aq jergilikti atqarýshy organdarmen birlesip jedel sheshýdi qajet etetin máseleler qaraldy.
Ulytaý oblysyndaǵy respýblıkalyq mańyzy bar avtomobıl joldarynyń jalpy uzyndyǵy 989 shaqyrymdy quraıdy. Qazirgi ýaqytta onyń 571 shaqyrymy qaıta jańartý jumystarymen, 135 shaqyrymy ortasha jóndeýmen, taǵy 40 shaqyrymy aǵymdaǵy jóndeýmen qamtylǵan.
Keńeste «Qyzylorda – Jezqazǵan» avtomobıl jolynyń 208 shaqyrymyn qaıta jańartý jobasyna erekshe nazar aýdaryldy. Nysanda 1 100-ge jýyq maman men 600 tehnıka jumys istep jatyr.
Búginde jer jumystarynyń 97 paıyzy oryndaldy. 164 shaqyrymǵa qum-qıyrshyqtas qospasy, 153 shaqyrymǵa jol negiziniń tómengi qabaty, 133 shaqyrymǵa joǵarǵy qabaty tóseldi. 95 shaqyrymǵa asfaltbeton jabynynyń tómengi qabaty, 27 shaqyrymǵa joǵarǵy qabaty tóselgen.
Eki kópirdiń qurylysy aıaqtaldy, taǵy eki nysanda jumystar jalǵasýda. Jobada qarastyrylǵan 96 sý ótkizý qubyrynyń 80-i tolyq daıyn. Bıyl jańartylyp jatqan ýchaskeniń boıynda asfaltbeton jabyny arqyly kólik qozǵalysyn qamtamasyz etý josparlanyp otyr.
-Mundaı aýqymdy jobalardy iske asyrý ulttyq kompanııanyń, ákimdikterdiń jáne merdiger uıymdardyń naqty ári úılesimdi jumysyn talap etedi. Jumys qarqynyna áser etetin barlyq másele jedel sheshilýi tıis. Bul rette qurylys sapasy, belgilengen merzimderdi saqtaý jáne jol qozǵalysynyń qaýipsizdigin qamtamasyz etý negizgi talap bolyp qala beredi, – dedi Darhan Imanashev.
Sonymen qatar «Jezqazǵan – Qaraǵandy» avtomobıl jolyn qaıta jańartý jobasynyń oryndalý barysy jeke qaraldy. Ulytaý oblysynyń aýmaǵynda joba 335 shaqyrym joldy qamtıdy jáne úsh lotqa bólingen. Qazirgi ýaqytta merdiger uıymdar óndiristik bazalardy ornalastyryp, tehnıka men jumys kúshin jumyldyrýda, sondaı-aq jobalaý jáne daıyndyq jumystaryn júrgizip jatyr.
Joba aıasynda 20 kópir, 17 jol ótpesi, eki kólik aıryǵy jáne 245 sý ótkizý qubyry salynady. Jobany iske asyrý merzimi – 2026–2029 jyldar.
Sondaı-aq «Qarajal – Atasý», «Jezqazǵan – Arqalyq» jáne «Jáırem – Qarajal – Atasý» baǵyttaryndaǵy jumystar talqylandy. Oblysta jalpy 135 shaqyrym jol ortasha jóndeýmen qamtylǵan.
Uzyndyǵy 74 shaqyrym bolatyn «Jezqazǵan – Arqalyq» ýchaskesindegi jumystardyń 67 paıyzy oryndaldy. «Jáırem – Qarajal – Atasý» jolynda 32 shaqyrymǵa resaıklıng jumystary júrgizilip, 25 shaqyrym asfaltbeton jabyny tóseldi.
-Kezdesý barysynda birlesip sheshýdi qajet etetin birqatar másele belgilendi. Olardyń qatarynda óndiristik bazalar men asfaltbeton zaýyttaryna jer telimderin bólý, karerlerdi rásimdeý, tehnıkalyq sharttardy alý, nysandardy ınjenerlik jelilerge qosý jáne qurylys materıaldaryn temirjol arqyly jetkizýdi uıymdastyrý máseleleri bar,-delingen habarlamada.
Keńes qorytyndysy boıynsha «QazAvtoJol» fılıaldary men merdiger uıymdarǵa kóterilgen máselelerdiń sheshilýin jedeldetip, bekitilgen jumys kesteleriniń saqtalýyn qamtamasyz etý tapsyryldy.
Osyǵan deıin «QazAvtoJol» merdiger uıymdardy alaıaqtyq áreketterden saq bolýǵa shaqyrǵan bolatyn.
