Jezqazǵan qalasynyń 65 jyldyǵyna oraı 65 ıgi is atqarylady
QARAǴANDY. QAZAQPARAT - Qalanyń 65 jyldyǵyna oraı Jezqazǵanda «65 ıgi is» jospary quryldy. Bul jaıly qala ákimi Qaırat Begimov halyq aldyndaǵy eseptik kezdesýi barysynda málimdedi, dep habarlaıdy QazAqparat tilshisi.
Qaraǵandy oblysynda bıyl Jezqazǵan qalasynyń 65 jyldyǵy atap ótiledi. Qala Keńgir kentiniń ornynda paıda bolǵan. Keıin ataýyn Jezqazǵan dep ózgertken. 1954 jyly 20 jeltoqsanda ol qala statýsyn alǵan. Sol ýaqyttan beri jeltoqsannyń 20-synshy juldyzy shahardyń týǵan kúni retinde belgilengen.
«Osy jyly biz qyrýar jumys atqarýymyz kerek. Sebebi bul jyl qoǵamdyq-saıası, tarıhı máni bar oqıǵalarǵa toly. Ol - «Jastar jyly» jáne Jezqazǵannyń 65 jyldyq mereıtoıy, - dedi qala basshysy. - Bul ózimizdiń jetistikterimizdi kórsetýge jáne týǵan ólkemizdiń damýyna kúshimizdi shoǵyrlandyrýǵa jol ashatyn múmkindik».
Qala ákimi «65 ıgi is» josparyna engizilgen anaǵurlym mańyzdy jobalardy atap ótti. Ol - jańa kópqabatty úıdiń qurylysy, keńes berý-dıagnostıkalyq ortalyqtyń ashylýy, Ǵaryshkerler gúlzaryn, «Jastar» saıabaǵyn, Q.Sátpaev atyndaǵy alańdy qaıta qalypqa keltirý jáne t.b. Aldaǵy ýaqytta jańa bıznes nysandary da ashylady dep josparlanýda.
2019 jyly Jezqazǵanda 900 orynǵa shaqtalǵan jańa mektep salynady. Joba quny - 1,9 mlrd teńge.
Ákimniń aıtýynsha, qalanyń eki mektebinde bıylǵy jyly ІT-kabınetter jabdyqtalady. Alty mektepte qurylǵylar men ashanalardaǵy jıhazdar jańartylyp, sport jabdyqtary satyp alynbaq.
Jaqyn arada qalada jańa sport nysandary - 320 orynǵa arnalǵan dene shynyqtyrý-saýyqtyrý kesheni, espe sport túrine arnalǵan keshen paıda bolady. Olardyń qurylysy osy jyly bastalady.
«Memlekettik-jekeshelik áriptestik boıynsha bıznesmender jalpy somasy 5 mlrd teńgege jobalardy júzege asyrady»,- dep málimdedi Qaırat Begimov.
Sonymen qatar Taekvondo ortalyǵy ashylady dep josparlanýda. Eki iri joba kóshelerdi jaryqtandyrý jáne kógaldandyrýdy qamtıdy.
Qalada sonymen qatar jańa sýpermarket paıda bolady. Onda kásipkerler áleýmettik baǵalar qoıýǵa ýáde berip otyr.
Jezqazǵandyqtar «Saryarqa» gaz qubyry magıstraliniń qurylysyna úlken úmit artyp otyr. Aýqymdy joba Elbasynyń tapsyrmasy boıynsha júzege asyrylýda.
«Gaz qubyryn tartý shalǵaıdaǵy turǵyndardyń turmystyq jaǵdaıyn jaqsartýǵa múmkindik beredi jáne aımaǵymyzdyń damýyna oń áserin tıgizeri haq», - dedi Jazqazǵan qalasynyń ákimi.
